कैलारीके अइना आवके बजेट, नीति तथा कार्यक्रम सार्वजनिकीकरण

विना पत्ता आइल प्रदेश योजनाके सिफारिस नैकरब ः अध्यक्ष
पहुरा समाचारदाता
हसुलिया, २७ असार । कैलारी गाउँपालिकाके अध्यक्ष राजसमझ चौधरी विना जानकारी लागु हुइल प्रदेश योजनाके सिफारिस बन्द कैना जनैले बटै ।

सोम्मारके रोज हसुलियामे हुइल कैलारी गाउँपालिकाके आगामी आर्थिक वर्ष २०७९÷०८० के बजेट, नीति तथा कार्यक्रम सार्वजनिकीकरण कार्यक्रम ओ चालु आर्थिक वर्ष २०७८÷०७९ सालके सार्वजनिक सुनुवाई कार्यक्रममmे उहाँ उ बाट बत्वाइल रहिट ।
गाउँपालिकामे विना जानकारी कतिपय प्रदेश योजना लागु हुइल डेखल बा,’ अध्यक्ष कहलै, ‘योजना कहाँ–कहाँसे कब आइठ । उपभोक्ता समितिफे बनल पत्ता नइ नइचलठ । एकचोट्टे भुक्तनीके लाग सिफारिस लेहे आइल डेखल बा । आब विना जानकारी लागु हुइल योजनाके सिफारिस बन्द कैजाई ।’

उहाँ कहलै, गाउँपालिकामे सिचाई, बाढ, डुबानके समस्या बा । सिचाईके समस्या समाधान कैना निरन्तर पहलमे बाटी, अब्बे २ ठो टन्सफार्मर २ सय ठो पोलके बाट हुसेकल बा ।’ बाल विकास शिक्षकके तलब यिहे सावनसे १५ हजारके व्यवस्था कैना, सडक बत्तीके लाग गाउँपालिकासे ३० लाख ओ विद्युत कार्यालयसे २० लाख करके ५० लाख बजेट विनियोजन करल उहाँ जनैलै ।
गाउँपालिका भिटर टमान वडामे मोहना, घुरहा, कटैनी लडिया खेती योग्य जमिन कटनाके साथे उठीबास हुइना अवस्था आइल ओरसे विशेष ध्यान डेहल, छोरुवा गोरुनके व्यवस्था कैनाफे अध्यक्ष बटैलै । गाउँसभाके पहिल बैठल बैठकसे मालपोत करमे ५० प्रतिशत छुट, सुत्केरी महिलाहेफे सम्बोधन करल, गाउँघरमे बच्चा जल्मना अवस्था नइरहलेसे जिल्ला भिटर चाहे जहाँ लैगिलेसे निशुल्क एम्बुलेन्सके व्यवस्था करल उहाँ जनैलै ।

ओस्टेक सीमान्तकृत वर्ग जे अभिन विद्युत मिटरसे जे बन्चित रहे ओइनके निशुल्क विद्युत वितरणके तयारीमे रहल । गाउँपालिका सूचना जारी करलपाछे २ सय ४३ निवेदन परलमे १ सय ५४ निवेदनके केल कागजात पुगल । विद्य्ुत मिटर आसेकल बा ओरसे काल्हसे विद्युत मिटर वितरण कैना उहाँ जनैलै । कृषि विद्युत मिटरके लागफे पहल हुइटी रहल उहाँ जनैलै । गाउँपालिका दमकल खरिदके लाग गौरीगंगा नगरपालिकासे छलफलमे रहलफे उहाँ बटैलै ।

वडा नम्बर ७ के अध्यक्ष तथा गाउँपालिका प्रवक्ता दिपेन्द्रबहादुर बम जनताके आकांक्षा अनुसार ५० प्रतिशत भुमिकर छुट डेहल बटैलै । चार ठो वटा संस्थासे हातेमालो सुरु करल, सुकुम्बासी, भुमिहिनहे लालपुर्जा वितरण करेक लाग प्रक्रिया सुरु हुइल ओरसे हाली लालपुर्जा वितरण कैना उहाँ बटैलै । गैल बरसके कुवाँर कार्तिकमे आइल बेमौसमी बाढसे पीडितके खातामे पैसाफे जमा करसेकल प्रवक्ता बम बटैलै । यहाँके किसानहे मल खादके समस्या हुइल ओरसे मलखादके व्यवस्था करुवाइल । चटयाङसे ज्यान गुमाइल परिवारहे २ लाख राहतके व्यवस्थाफे करुवाइल उहाँ बटैलै ।

नेपाली काँग्रेस कैलारी सभापति कृष्णप्रसाद चौधरी पाँच बर्षमे जनताके हितमे काम कैना आग्रह करलै । आघेक जनप्रतिनीधि अपन कार्यकर्ता ओ नातागोटाके विकास करल आरोप लगैलै । उहाँ कहलै, गाउँपालिकाके विकास कैना ठाउँके कार्यकर्ता ओ नातागोटाके विकास हुइल, जनता ओइनहे चिन्हलै ओ चुनावमे फेक्लै ।’ चुनाव आघे पार्टीसे भर्ना करल करार कर्मचारीके छानविन करे पर्ना, शिक्षामे ध्यान डेटी बहुमुखी क्याम्पसके लाग समन्वय कैना । सक्षम किसानहे अनुदान डेहे पर्ना ओ रातरात उपभोक्ता समिति बनैना काम बन्द करे पर्ना उहाँ आग्रह करलै ।

नेकपा एमालेके प्रतिनिधि तिर्थप्रसाद नेपाल कैलारी गाउँपालिकाहे नमुना गाँउपालिका बनैना चुनौती पूर्ण रहल बटैलै । लडिया कटानहे रोके पर्ना, छोटी भन्सार पुनःस्थापनामे ध्यान डेहे पर्ना उहाँ आग्रह करले रहिट ।
नागरिक उन्मुक्ती पार्टीके कैलारी अध्यक्ष चन्द्र चौधरी ‘चाँद’ चालु आर्थिक बर्षमे गोहुँ वितरणमे पारदर्शि नहुइल बटैले रहिट । गाउँपालिकासे दमकल खरिदके करल निर्णय मजा रहल, सर्पदंशक उपचार केन्द्रके व्यवस्था करे पर्ना, भाषा कला सस्कृतिके लाग बजेट विनियोजना करे पर्ना ओ नैतिक शिक्षामे समेत जोर डेहे पर्ना उहाँ बटैलै ।

राप्रापके कैलाली जिल्ला अध्यक्ष होमबहादुर गुरुङ अपनेहुक्रे प्रतिपक्षके भुमिकामे रहल ओरसे मजा कामके समर्थन कैना, गलत कदममे खबरदारी कैना बटैलै । सीमा जोरल वडाबासी बहुत समस्या रहल, सुर्मीनाला लौसा डगर तीन बर्षसे कालो पत्रे हुइटी रहल कहल मने कामभर कुछ नइहुइल ओरसे नेङघुमके समस्या हुइना करल उहाँ बटैलै ।

ओस्टेक करके कार्यक्रममे सिएफसीसी हसुलियाके अध्यक्षके रमेश चौधरी अइना योजना धारेबेर छलफल करे पर्ना, छाडा चौपायाके समस्या समाधान करे पर्ना, कृषि लाइन विस्तार करे पर्ना बटैले रहिट । नेपाली काँग्रेसके पूर्व जिल्ला सहसचिव कलेशुराम चौधरी समयमे विउ, मलके व्यवस्था कैना आग्रह करले रहिट । किसान जबफे घाटामे रहल ओरसे कृषिमे आधारित कार्यक्रम नन्नामे उहाँ जोर डेलै ।

कमल चौधरी शिवरत्नापुरमे तीन बर्षसे झोलुगे पुल बन्टी रहल मने अभिन तयार नइहुइल ओरसे हाली पहल कैना, तटबन्ध पुहाइल कारण १५ घर बाढके उच्च जोखिममे रहल ओरसे उहोर ओरफे ध्यान डेना बटैलै । खोप किलनिक बनल मने संचालनमे नइआइल, भारतमे वेगारी करे पर्ना समस्या झेल्टी रहल उहाँ बटैलै ।

कैलारी–४ के भल्मन्सा टेकबहादुर परियार बनुवामे डगर बनैनासेफे गाउँघरके डगर सुधार करे पर्नामे बटैले रहिट । कलेशुराम चौधरी जनकल्याण माविके टिनसे छाइल भवन जिर्ण हुइल ओरसे ओहोरफे ध्यान डेहे पर्ना, छाडा गाईगोरुके व्यवस्थापन कैना आग्रह करलै ।

कैलारी उद्योग बाणिज्य संघके अध्यक्ष नेपालु चौधरी हसुलिया बजार शौचालयके व्यवस्था नइरहल, ढल निकासके समस्या, हसुलिया बजारके सक्कु जग्गा ऐलानी प्रति रहल बटैलै । कैलारी गाउँपालिकामे उत्पादन हुइल वस्तु बजारीकरणके लाग व्यवस्था कैनाडेना ओ छोटी भन्सार पुनःस्थापना करे पर्ना आग्रह करलै ।

नबिन बोहरा कृषि उपज संकलनके लाग टहरा बनल मने कार्यान्वयन नइहुइल, वडा वडामे भेटनरी विज्ञके व्यवस्था नइहुइल बटैलै । भौतिक पूर्वाधारके अधुरो योजनाहे सम्पन्न कैना, राष्ट्रिय वनहे साझेदारी वन बनैना, वडा कार्यालयसे सेवा लेना दुर रहल ओरसे नवलपुर गाउँहे वडा नम्बर १ मे गाँभ्ना आग्रह करल रहिट ।

वडा नम्बर ४ के गाउँ खल्ला टोल भल्मन्सा जगलाल डगौराथारु बुच्चरके कारण बंगुर पालक किसान मर्कामे परल बटैलै । गाउँपालिकासे मासुके रेट तोकडेना, भल्मन्साके सेवा सुविधा पहिचानके लाग व्यवस्था कैडेना आग्रह करलै ।
बृद्धिजीवी मनिराज खनाल कौनो पक्षपात नइकरके कैलारीके जनताहे सेवा प्रवाह कैना आग्रह करलै । कैलारीके
टमान ठाउँमे पानी टंकी बनल १० बर्ष विटल मने पानी घर–घर अभिननइपुगल बटैलै ।
कैलारी गाउँपालिका–५ के विन्तीराम चौधरी शिक्षा, थारु भाषा कलासंस्कृतिमे लगानी कैना आग्रह करटी बृद्धा भत्ताके बुझना व्यवस्था मिलैनाफे उहाँ आग्रह करलै ।

कार्यक्रममे सामाजिक विकास अधिकृत यगम कलेल कैलारी गाउँपालिकाके आर्थिक वर्ष २०७८÷ ०७९ सालमे करल गतिविधिबारे जानकारी ओ आगामी आ.व.२०७९÷ ०८० के बजेट, नीति तथा कार्यक्रम सार्वजनिक करल रहिट । गाउँपालिकाके चालु आर्थिक वर्षमे २०७८÷ ०७९ सालके असार २५ गतेसम कुल निकास ६६ करोड ९० लाख ६८ हजार रहलमे कुल खर्च ६० करोड ८१ लाख ५५ हजार हुइल उहाँ बटैलै । चालु आवमे ४५ ठो विवाद दर्ता हुइलमे ३७ ठो सहमति ७ ठो प्रक्रियामे एक ठो सहमति नइहुइल, ४ ठो कानूनी सचेतना तालिम डेहल उहाँ बटैलै । ११ ठो विद्येयक दर्ता हुइलमे ९ ठो पास हुइलफे उहाँ जनैलै ।

ओस्टेक आर्थिक बर्ष २०७९÷०८० के लाग गाउँपालिकासे विनियोजन रकम ५९ करोड २५ लाख २१ हजार ओ गैर सरकारी संघ संस्थाके कार्यक्रम ३ करोड ४९ लाख ९४ हजार करके ६२ करोड ७५ लाख १५ हजार कुल बजेट रहल रहल उहाँ जनैलै ।
कैलारी गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे उहाँ व्यानर बाचन करके कार्यक्रमके उदघाटन करल रहिट । कार्यक्रममे स्वागत तथा कार्यक्रमके बारेमे जानकारी गाउँपालिका उपाध्यक्ष भगवतीकुमारी चौधरी करले रहिट । कार्यक्रममे गाउँपालिका प्रमुख प्रशासकीय अधिकृत विरबहादुर ऐर, गाउँपालिकाके १ से ९ समके वडा अध्यक्ष, कार्यपालिका सदस्य, टमान राजनीतिक दलके प्रतिनीधि, संघ संस्थाके प्रतिनीधि, कैलारी गाउँपालिकाके स्थानीयबासी रहल सहभागिता रहल रहे ।

कार्यक्रम कैलारी गाउँपालिकाके आयोजना ओ सहजीकरण केर्नी मिडिया प्रालिसे हुइल रहे । कार्यक्रमके सहजकर्ता पत्रकार लखन चौधरी रहल रहिट ।