प्रदेश राजधानीके निर्णय उल्टाइ सेकजाइः राज्यमन्त्री रैका
पहुरा समाचारदाता
धनगढी, २८ असार । सुदूरपश्चिम प्रदेश राजधानीके निर्णय उल्टाइ सेकजैना प्रदेशके सामाजिक विकास राज्यमन्त्री टेकबहादुर रैका अभिव्यक्ति डेले बटै ।
डोटीहे पूर्णखोप सुनिश्चितता तथा दिगोपना जिल्ला घोषणा कैना सोम्मारके डोटीके दिपायलमे आयोजिक कार्यक्रममे बोल्टी मन्त्री रैका अइना निर्वाचनपाछे डोटीमे राजधानी तोके सेकजैना बटाइल हुइट ।
‘सम्भावना ओ लगानी नै लगाइ नैसेकजैना क्षेत्रमे स्थायी राजधानी तोकजैनासे पर्याप्त सरकारी संरचना ओ भवन रहल तत्कालीन क्षेत्रीय सदरमुकाममे राजधानी तोके पर्ना रहे’ मन्त्री रैका कहलै,’दिपायलमे आभिन फेन राजधानी फिर्ता लाने सेकजाइ ।’
प्रधानमन्त्री देउवा जस्टे मन्त्री रैका फेन राजधानीके लाग डोटेली मतदातासँग भोट मग्लै । उहाँ कहलै, ‘आगामी निर्वाचनमे जनता विवेक पुगाके मतदान करलमे अइना सरकारसे राजधानीके निर्णय उल्ट्याइ सेकी ।’
उहाँ थप्लै ‘मै फेन डोटीमे राजधानी कायम करक लाग कहाँ अनसन बैठे परी, कहाँ आन्दोलन करे परी, कहाँसे निर्णय कराइ परी तयार बाटुँ ।’
सुदूरपश्चिम प्रदेश राजधानी कैलालीके गोदावरीमे तोकल चार बरस पुगे लागलमे समेत राजधानी तोकल ठाउँमे कौनो संरचना निर्माण हुइ सेकल नैहो । प्रदेश सरकारसे राजधानी बनैना ठाउँके जमिनके स्वामित्वसमेत लेहे सेकल नैहो । राजधानी बनुवामे तोकल कहटी आलोचना हुइटी रहल बेला सरकारी ओहदाके व्यक्ति भर राजधानी सारे सेकजैना कहटी भाषण कैटी नेँगल बाटै ।
