एसईईके नतिजा सावन पहिल अँठ्वार अइना
काठमाडौं, २८ असार । माध्यामिक शिक्षा परीक्षा (एसईई) के नतिजा सावन पहिल अँठ्वार सार्वजनिक हुइना हुइल बा । माध्यामिक शिक्षा परीक्षा (एसईई) परीक्षा नियन्त्रण कार्यलयके अनुसार सक्कु परीक्षण केन्द्रसे विद्यार्थीके उत्तरपुस्तिका केन्द्रमे लन्ना ढिउर समय लागल ओरसे नतिजा सार्वजनिक कैना ढिलाइ हुइल हो ।
इहीसे आघे असार मसान्तभित्रे नतिजा सार्वजनिक कैना कार्यलयसे बटैटी आइल रहे । देशभरके ५६ परीक्षण केन्द्रसे उत्तरपुस्तिका असार २१ गते एसईई परीक्षा नियन्त्रण कार्यलयमे जम्मा हुइल रहे ।
राष्ट्रिय परीक्षा बोर्डसे इ बरस विद्यार्थीनके प्राप्तांक प्रदेशसे नै अपडेट कैना बटैटी आइल रहे । मने, प्रदेशसे अपडेट कैना सफ्टवेयर जडान नैहुइल ओरसे इ बेर केन्द्रसे सक्कु नतिजा सार्वजनिक हुइना परीक्षा नियन्त्रण कार्यालय जनैले बा ।
२०७९ वैशाख ९ गतेसे २० गतेसम सञ्चालन हुइल २०७८ सालके एसईईके परीक्षण होसेकल ओरसे उत्तरपुस्तिकाहे सानोठिमीस्थित परीक्षा नियन्त्रण कार्यालयमे जम्मा करल रहे । ओस्टके जापानसे एसईई परीक्षा डेहल विद्यार्थीनके उत्तरपुस्तिका फेन नेपालमे लानके परीक्षण करल कार्यालय जनैले बा ।
