लागुऔषध प्रयोग तथा ओसारपसारमे कैलाली चौठा स्थानमे

पहुरा समाचारदाता
धनगढी,२८ असार । नेपालभर लागुऔषध प्रयोग तथा ओसारपसार कैना जिल्लामन्से कैलाली चौठामे नम्बरमे रहल गृहमन्त्रालय जनैले बा ।

मंगकरे रोज धनगढीमे हुइल लागुऔषध सम्बन्धी अन्तरक्रिया कार्यक्रममे लागुऔषध नियन्त्रण शाखाके प्रमुख गोकर्णप्रसाद उपाध्याय यैसिन जानकारी डेहल हुइट । कार्यक्रममे कैलालीमेफे टीकापुर नगरपालिकामे लागुऔषधके प्रयोगकर्ता सबसे ढेर रहल जिल्ला प्रहरी कार्यालय कैलालीके प्रहरी उपरीक्षक सोमेन्द्रसिहं राठौर बटैलै । पहिलमे टीकारपुर ओ दुसरा नम्बरमे धनगढी उपमहानगरपालिका रहल उहाँ बटैलै । उहाँक अनुसार लागुऔषध प्रयोगकर्ता प्रहरी नियन्त्रणमे रहलेसेफे ओकर अवैध वितरण भारतसे हुइना ओरसे अनुसन्धान तथा नियन्त्रणमे चुनौति रहल बा । कैलालीमे लागूऔषध प्रयोगकर्ताके संख्या बढ्टी बा । भारतीय सीमासंग जोरल कैलालीमे गैल वर्षसे चालु आर्थिक वर्षमे दोब्बर ढेर लागूऔषध प्रयोगकर्ताहे प्रहरी पक्राउ करले बा ।

जिल्ला प्रहरी कार्यालय कैलालीके तथ्यांक अनुसार चालु आर्थिक वर्ष २०७८÷७९ के जेठ ३१ गतेसम लागूऔषधसहित २७३ जाने पक्राउ परल बटै । पक्राउ परल मन्से ११ जाने महिला रहल बटै । प्रहरी उ अवधिमे १७१ मुद्दा दर्ता हुइल जनैले बा । पक्राउ परलसे ब्राउन सुगर, नाईट्रोभेट, चरेश, खैरो हेरोइन बरामद हुइल प्रहरीके तथ्यांकमे उल्लेख बा । गैल आर्थिक वर्ष २०७७÷०७८ मे प्रहरी १३२ जनहनहे लागूऔषधसहित पक्राउ करल रहे । पक्राउ परल मन्से ६ जाने महिला बटै । उ अवधिमे प्रहरी ९१ ठो मुद्दा दर्ता करले बा ।

कार्यक्रममे धनगढी उपमहानगरपालिकाके नगरप्रमुख गोपाल हमाल लागुऔषध प्रयोगकर्ताहे समुदायसे छुट्याई पर्ना बटैलै । कैलालीके अवस्था भयावह रहल ओ अस्टे अवस्था रहन हो कलेसे युवाके भविष्य धरापममे पर्ना हमाल बटैलै । ‘लागुऔषधके लतमे फसलहुकनहे तत्काल समुदायसे अलग्याके रिह्याब सेन्टरमे धारे परल’ उहाँ कहलै, ‘सक्कु तहके सरकार तथा संस्था मिलके यी विरुद्धके अभियानमे लागे परल ।’ धनगढी उपमहानगरपालिकासेफे लागुऔषध नियन्त्रणबारे नीति नानल उहाँ बटैलै । उपमहानगर सुरक्षा निकाय तथा अन्य सरोकारवाला निकायसंग सहकार्य करके लागुऔषध विरुद्धके अभियानमे लग्ना मेयर हमाल बटैलै ।

आर्थिक वर्ष २०७६÷७७ मे लागूऔषधसहित १६१ जनहनहे पक्राउ करल प्रहरीके तथ्यांकमे उल्लेख बा । उ अवधिमे ९८ मुद्दा दर्ता हुइल प्रहरीके तथ्यांक बा । पक्राउ परलस ब्राउन सुगर, गाँजा, नाईट्रोभेट, स्पास्मो, कोरेक्स ओ चरेश बरामद हुइल तथ्यांकमे बा । प्रहरी तीन वर्षमे ५६६ जनहनहे लागूऔषधसहित पक्राउ करले बा । प्रहरी उ अवधिमे ३६० मुद्दा दर्ता करले बा । पक्राउ पर्नामे सबसे ढेर ब्राउन सुगरसहितके रहल कैलाली प्रहरी जनैले बा ।

जिल्ला कैलालीके प्रहरी उपरीक्षक सोमेन्द्रसिहं राठौरके अनुसार जिल्लाके त्रिनगर भन्सार, गोदावरी, टीकापुर, भजनी, लम्की ओ चिसापानीसे ओइने पक्राउ परल हुइट । प्रहरी तीन वर्षके अवधिमे कैलालीमे पक्राउ परल हुकनसे भारी परिणाममे ब्राउन सुगर, गाँजा, चरेश, नाईट्रोभेट, स्पास्मो, कोरेक्स बरामद करले बा । पक्राउ परलसे प्रहरी ९१३ ग्राम ९३१ मिलिग्राम ब्राउन सुगर, ७० किलो ६३५ ग्राम चरेश, ३५ किलो ४१९ ग्राम गाँजा, नाईट्रोभेट ६ हजार ७४४ ट्याब्लेर, स्पास्मो दुई हजार ६५५ ट्याबलेट बरामद करल प्रहरीके तथ्यांकमे बा ।

प्रमुख जिल्ला अधिकारी किरण थापाके अध्यक्षतामे हुइल कार्यक्रममे पञ्चोदय माविके प्रअ हरिशकुमार ओझा, गौरीगंगा नगरपालिकाके उपप्रमुख भोजबहादुर बम लगायत मन्तव्य करले रहिट । कार्यक्रममे कैलाली १३ स्थानीय तहके प्रमुख उपप्रमुख, विद्यालयके प्रअहुकनके सहभागिता रहल रहे ।

खैरो हेरोईनसहित ७ जाने पक्राउ
जिल्ला प्रहरी कार्यालय कैलाली ३५ ग्राम लागु औषध खैरो हेरोईनसहित ३ जनहनहे पक्राउ करले बा ।

सोम्मारके रोज सुदुर–पश्चिडम प्रदेश प्रहरी कार्यालय, जिल्ला प्रहरी कार्यालय ओ ईलाका प्रहरी कार्यालय मसुरियासे खटल तीन जनहनहे पक्राउ करल हो । पक्राउ परलमे कैलाली घोडाघोडी नगरपालिका–२ शिवनगर बैठना बर्ष २८ के हिक्मत बहादुर बम, जोशीपुर गाउँपालिका–७ सिमरी बैठना वर्ष २७ के रामबहादुर सिराडी ओ गौरीगंगा नगरपालिका ९ शान्तिपुर बैठना घर धनी मेघराज पौडेलके छावा वर्ष २७ के ईश्वर पौडेल रहल बटै ।

प्रहरी टोली विशेष सुचनाके आधारमे कैलालीके गौरीगंगा नगरपालिका वडा नं. ०९ शान्तिपुर बैठना मेघराज पौडेलके घर खान तलासी करेबेर घरभिटर धारल ३५ ग्राम लागु औषध बरामद करके उ व्यक्तीहुकनहे नियन्त्रणमे लेके कैलाली जिल्ला अदालतसे म्यादथप करके थप अनुसन्धान कार्य हुइटी रहल जिल्ला प्रहरी कार्यालय कैलाली जनैले बा ।

ओस्टेक करके टिकापुर ९ स्थित खक्रौलामे रहल प्रहरी चेक पोष्टमे कालाकुण्डा प्रहरी लागू औषध सहित चार जनहनहे पक्राउ करले बा ।
भे १ ह ४२७४ नं. के अटोमे भारतसे अइटी रहल अवस्थामे बर्दीया राजापुर नगरपालिका वडा न. ७ बैठना बर्ष २५ के लक्ष्मण सुनार, वर्ष २५ के तेज बहादुर बिटालु, वर्ष २४ के अजय दमाई ओ वर्ष २४ के नागेश्वर थारुहे चेक जाँच कैना क्रममे अटो भिटर पट्टि छतके भागमे प्लाष्टिकमे पोका पारके नुकाके धारल अवस्थामे ६ ग्राम ६०० मिलि ग्राम लागु औषध खैरो हिरोईन सहित चार जहनमे नियन्त्रणमे थप अनुसन्धानके लाग टिकापुर प्रहरी कार्यालयमे धारल प्रहरी जनैले बा ।