घोडाघोडीके उत्कृष्ट ७ कर्मचारी सम्मानित

पहुरा समाचारदाता
धनगढी, २९ असार । कैलालीके घोडाघोडी नगरपालिका पालिकामे कार्यरत ७ जाने कर्मचारीहुकनहे कार्यसम्पादनमे उत्कृष्ट काम करल कटि नगद पुरस्कारसहित सम्मान करले बा ।

मंगरके रोज पहलमानपुरमे हुइल नगरपालिके १५ औँ नगरसभाके दोसर बैठकमे सेवा प्रवाह ओ विकास कार्यमे उत्कृष्ट कार्यसम्पादन करल कटि उहाँहुकनहे सम्मान करल हो ।

सम्मानित हुइल कर्मचारीमे शिक्षा शाखा अधिकृत उमेशराज रेग्मी, प्रशासन शाखाके प्रमुख छविलाल बिनाडी, इन्जिनियर किशोर भट्ट, सहायक पाँचौँ जयन्तकुमार विष्ट, स्वास्थ्य शाखाके रामप्रसाद चौधरी, वडा नम्बर ११ के वडा सचिव प्रमोद कुश्मी ओ कार्यालय सहयोगी लक्ष्मी घर्तीमगर रहल बटैं ।

उहाँहुकनहे नगरप्रमुख खड्कबहादुर रावत, उपप्रमुख गुलियाकुमारी चौधरी ओ प्रमुख प्रशासकीय अधिकृत दीपककुमार आचार्य एक समारोहके बीच नगद ओ सम्मानपत्रसहित पुरस्कृत करले रहैं ।

उहाँहुक्रे कार्यालयके काममे अहोरात्र खटके सार्वजनिक सेवा प्रवाहहे चुस्तदुरुस्त बनैनामे अहम् भूमिका निर्वाह करल नगरपालिका जनैले बा । मजा काम करना कर्मचारीके मनोबल उच्च बनाइक लागल नगरपालिका उचित मूल्यांकन करटि प्रत्येक वर्ष पुरस्कृत करटि आइल बा ।