सुदूरपश्चिम प्रदेशसे ४ स्रष्ठाहुकनहे सम्मान
पहुरा समाचारदाता
धनगढी, २९ असार । सुदूरपश्चिम प्रदेशके भाषा, सहित्य, संस्कृति एंव गायन, संगीत, कला क्षेत्रके महत्वपूर्ण योगदान करुइया स्रष्टाहुकनहे सुदूरपश्चिम प्रदेश सरकार सम्मान एवं पुरस्कृत करले बा ।
२०९ औं भानु जयन्तीके अवसरमे बुधके रोज धनगढीमे स्रष्टाहुकनहे प्रदेशके सामाजिक विकास मन्त्रालय ४ जाने श्रष्ठाहुकनहे सम्मान करल हो ।
उहाँहुनकहे सामाजिक विकासमन्त्री गोविन्द बोहरा ओ राज्यमन्त्री टेकबहादुर रैका एक समारोहके बीच नगद ७५ हजार रुपयाँसहित दोसल्ला ओढाके सम्मान करले रहैं ।
सम्मानित हुइनामे लोक संस्कृति विद्याओर डडेल्धुरा अजयमेरु गाउँपालिका–३ के वाशुदेव पाण्डेय, गायन विद्याओर धनगढी उपमहानगरपालिका–१, कैलालीके पप्पुकुमार जैरु (पिकेनारायण), ललितकला विद्याओर अजयमेरु गाउँपालिका–२, डडेल्धुराके तारा चुनारा ओ भाषा तथा साहित्य विद्याओर धनगढी उपमहानगरपालिका–५, कैलालीके रामलाल जोशी रहल बटैं । स्रष्टाहुकनहे सम्मानके लाग २१ जाने स्रष्टाहुकनके नाउँ सिफारिस हुइल रहे ।
कार्यक्रममे कैलाली जनपुस्कालयके अध्यक्ष टीएन जोशी, सुदूरपश्चिम साहित्य समाजके अध्यक्ष टकेराज पाण्डे, मूल्यांकन समितिके मणिराज जोशी, डिल्लाराज ओझालगायत मन्तव्य व्यक्त करले रहैं ।
कार्यक्रम सामाजिक विकास मन्त्रालयके प्रदेश सचिव दीपक लामिछानेके अध्यक्षतामे हुइल रहे ।
