महिलाहे प्रजनन स्वास्थ्य स्वच्छता व्यवस्थापन किट वितरण
पहुरा समाचारदाता
मसुरिया, २९ असार । कैलालीके महिलाहे प्रजनन स्वास्थ्य स्वच्छता व्यवस्थापन कैना नारी परियोजनासे सरसफाइ सम्बन्धी किट ओ महिनावारी व्यवस्थापन किट वितरण करले बा ।
परियोजनासे टीकापुर, भजनी ओ घोडाघोडी नगरपालिकामे अपांगता रहल महिला, गर्भवती महिला, मुक्त कमैया, दलित किशोरी ओ दीर्घ रोग लागल महिलाहे स्वच्छता किट ओ महिनावारी व्यवस्थापन किट वितरण करल हो ।
संकटासन्न महिलाहे सरसफाइ सम्बन्धी बानीके विकास कैना स्वच्छता किट ओ महिनावारी हुइल बेलामे सङ्क्रामक रोग लग्नासे बचाइक लाग महिनावारी व्यवस्थापन किट वितरण करल हो । टीकापुरमे ७०१ स्वच्छता किट ओ ८७८ महिनावारी व्यवस्थापन किट प्रदान करल रहे कलेसे जेम्ने १७१ जाने अपांगता रहल महिला रहल बाटै ।
भजनीमे ४७३ स्वच्छता किट ओ ८१७ महिनावारी व्यवस्थापन किट प्रदान करलमे १९७ जाने अपांगता रहल महिला बाटै । ओस्टके घोडाघोडीमे ६६३ स्वच्छता किट ओ ३५७ महिनावारी व्यवस्थापन किट प्रदान करलमे ११२ जाने अपांगता रहल महिला लाभान्वित हुइल बाटै ।
बाल कल्याण संघ टिकापुर ओ वर्ल्ड भिजन ईन्टरनेशनल नेपालके संयुक्त साझेदारीमे अस्ट्रेलिया सरकारके वैदेशिक मामिला तथा व्यापार विभागके आर्थिक सहयोगमे सञ्चालित नारी परियोजनासे समुदायमे रहल १५–४९ के प्रजनन वर्ष उमेर समूहके महिला प्रत्यक्ष रुपमे सहयोग पुगैटी आइल बा ।
इ परियोजनासे संकटासन्न अवस्थामे रहल प्रजनन स्वास्थ्य उमेर समूहके अपांगता रहल महिला, गर्भवती महिला, मुक्त कमैया, दलित किशोरी ओ दीर्घ रोग लागल महिलाहे चार हजारसे ढिउर स्वच्छता किट ओ महिनावारी व्यवस्थापन किट वितरण कैनाके साथे सम्पूर्ण स्वास्थ्य केन्द्र ओ प्रसूति गृहमे टमान चिकित्सकीय उपकरण प्रदान करसेकल बा ।
