उदासीपुरमे नगहर कार्यक्रम हुइना
पहुरा समाचारदाता
मसुरिया, ३० असार । कैलालीके गौरीगंगा नगरपालिका–१०, सुन्दरपुर गाउँस्थित थारु देउथान उदासीपुरमे यी बरस फेन नगहर कार्यक्रम हुइना हुइल बा । प्रत्येक बरस नाग पञ्चमी, गुरहिके दिन नगहर खेल जाइठ ।
सपिनके कटल बिष झारेक लाग गुरुवाहुक्रे यी खेल खेल्ठैं । यी बरस फेन लावा गुरवा खेलैना लक्ष्यसे वृहत् रूपमे नगहर कार्यक्रम हुइना हुइल बा ।
थारु गुरुवा बैदवा सेवा समिति समाज गौरीगंगाके आयोजनामे सावन १७ गते उदासीपुरके थारु देउथान नगहर खेल खेल्ना हुइल बा ।
गुरुवाहुक्रे अप्नही आर्थिक सहयोग उठाके कार्यक्रम करटि रहल समाजके नगर अध्यक्ष गोपालदास चौधरी बटैलैं । समाजमे आवद्ध गरुवाहुक्रे प्रतिव्यक्ति २०० रुप्या ओ लावा गुरुवा निक्रलेसे पुजाके लाग ४०० लेना अध्यक्ष चौधरी बटैलैं । ओस्टेके, सहयोग करना ईच्छुकहुक्रे फेन सहयोग करे सेकजिन अध्यक्ष चौधरी बटैले बटैं ।
कार्यक्रम “भाषा, कला, संस्कृति हमार पहिचान, थारु वैदिक गुरुवा प्रशिक्षण केन्द्रसंगे थारु संग्रहालय बनैना हमार अभियान” अभियान हुइटा ।
