मसुरिया स्वास्थ्य चौकी कैलालीके पहिल पोषणमैत्री संस्था घोषणा

घनश्याम पौडेल
मसुरिया, ३० असार । कैलालीके गौरीगंगा नगरपालिका वडा नं ९ के मसुरिया स्वास्थ्य चौकीहे जिल्लाके पहिल पोषण मैत्री स्वास्थ्य संस्था घोषणा करल बा ।

बिफेक रोज एक कार्यक्रमके आयोजना करके मसुरिया स्वास्थ्य चौकीहे कैलालीके पहिल पोषणमैत्री स्वास्थ्य संस्था घोषणा करल हो । पोषण सम्बन्धी १२ ठो सूचाङकके मूल्यांकनके आधारमे पोषणमैत्री स्वास्थ्य संस्था बन्न सफल हुइल स्वास्थ्य चौकीके प्रमुख लालप्रसाद पन्त जानकारी डेलै ।

जिल्ला समन्वय समिति कैलाली प्रमुख पदम बहादुर कलेल मसुरिया स्वास्थ्य चौकीसे मध्यवर्ती क्षेत्रके जनस्वास्थ्यमे महत्वपूर्ण सेवा प्रवाह करल कहटी अपन तहसे सहयोग कैना प्रतिबद्धता जनैले बटै ।

गौरीगंगा नगरपालिका प्रमुख देवीदत्त कडेल पोषण मैत्री स्वास्थ्य चौकी घोषणासंगे गुणस्तरीय सेवा प्रवाहमे नगरपालिकाके सहयोग रहना बटाइल कडेल आमा समुहके स्वास्थ्य चौकी घेरबार पर्खाल निर्माणके योजनाके बजेट फ्रिज जैनामे उहे जग्गामे बसोबास करटी रहल परिवारके व्यवस्थापन हुई नइसेक्के बजेट फ्रिज गैल बटैले रहिट ।

निवर्तमान वडा अध्यक्ष हरिप्रसाद तिवारी अपन कार्यकालमे मसुरिया स्वास्थ्य चौकीहे सुदुरपश्चिम प्रदेशके पहिल पोषणमैत्री स्वास्थ्य चौकी घोषणा कैना प्रयास करलै मने तत्कालिन नगरके नेतृत्व ओ कुछ व्यक्तिके असहयोगसे करे नइसेकल बटैलै । मसुरिया स्वास्थ्य चौकीहे मध्य क्षेत्रके उत्कृष्ट स्वास्थ्य संस्थाके रुपमे विकसित ओ विशेषज्ञ सेवा सहितके अस्पतालमे हेर्ना अपने सदैव प्रयत्नशील रहल कहटी तिवारी गौरीगंगा नगरपालिकाके वर्तमान नेतृत्वसे विगतमे अभावके विच स्तरिय सेवा डेना विगतसे उत्कृष्ट बनाई पर्नामे जोड डेले बटै ।

कार्यक्रममे वडा नं ५ के अध्यक्ष विष्णु भाट, युनिसेफ पोषण अधिकृत प्रकाश चन्द्र जोशी समेत मन्तव्य राखल रहिट ।
स्वास्थ्य चौकीहे सहयोग कैना समाजसेबी दिनेशराज जोशी, निवर्तमान वडा अध्यक्ष हरिप्रसाद तिवारी, निवर्तमान स्वास्थ्य व्यवस्थापन समितिके उपाध्यक्ष पवनकुमार बोगटी, सदस्य गणेश बि.क, स्वास्थ्य चौकीके सीनियर अहेव दिर्घराज जोशी, फाया नेपालके सुआहारा कार्यक्रम सुपरभाइजर यज्ञराज अबस्थी ओ स्वास्थ्य चौकी प्रमुख लालप्रसाद पन्त, स्वास्थ्य चौकीमे कार्यरत स्वास्थ्यकर्मी, स्वयंसेविका लगायतहे सम्मान करल बा ।

वडा नं ९ के अध्यक्ष तथा स्वास्थ्य चौकी व्यवस्थापन समितिके अध्यक्ष राजकुमार थारुके सभापतित्वमे कार्यक्रम सम्पन्न हुइल रहे ।