कैलाली पूर्णखोप सुनिश्चितता तथा दिगोपना घोषणा

पहुरा समाचारदाता
धनगढी, ३१ असार । कैलाली पूर्णखोप सुनिश्चितता तथा दिगोपना घोषणा हुइल बा । शुकके रोज सुदूरपश्चिम प्रदेशके सामाजिक विकासमन्त्री गोविन्द बोहरा ओ राज्यमन्त्री टेकबहादुर रैका एक समारोहके बीच कैलालीहे पूर्णखोप सुनिश्चितता तथा दिगोपना घोषणा करलैं ।

कार्यक्रम पूर्ण खोप समन्वय समिति स्वास्थ्य कार्यालय कैलालीके आयोजनामे हुइल रहे । कार्यक्रममे मन्त्री बोहरा लावा जन्मल लर्कनके जीवन रक्षाके लाग पूर्णखोप अतिमहत्वपूर्ण पक्ष रहल बटैलैं । उहाँ कलैं, “भरखर जन्मल लर्कनके मृत्युदर घटाइक लाग खोप लगैना आवश्यक बा ।” उहाँ छोट बालबालिकनके स्वास्थ्य सुधारमे संघसे लेके प्रदेश ओ स्थानीय सरकार लागल बटैलैं ।

उहाँ बालबालिकनके स्वास्थ्य सुधारमे राज्यके महत्वपूर्ण उत्तर दायित्व रहल बटैलैं । ओ, यी कार्यमे सुदूरपश्चिम प्रदेश सरकार प्रतिवद्ध रहिके काम करटि रहल जानकारी बटैलैं । कार्यक्रममे राज्यमन्त्री रैका प्रदेश सरकार स्वास्थ्य क्षेत्रहे पहिल प्राथमिकतामे ढैके कार्यक्रम सञ्चालन करल बटैलैं । ओस्टेके, कार्यक्रममे लम्कीचुहा नगरपालिकाके नगरप्रमुख सुशीला शाही जिल्लाहे पूर्णखोप सुनिश्चितता तथा दिगोपना घोषणा स्वास्थ्य स्वयम सेविकाहुकनके भारी योगदान रहल बटैलि ।

उहाँ कलि, “स्वास्थ्य स्वयम्सेविकाहुक्रे सरकारके खोपलगायतके अन्य स्वास्थ्यसम्बन्धी कार्यक्रममे मेहनत करटि आइल बटैं ।” उहाँ खोपसे वञ्चित बालबालिकाहुकनहे खोजके फेन खोप लगाइ परनामे जोर डेले रहि । कार्यक्रममे स्वास्थ्य स्वयम्सेविका अम्बिका अधिकारी, नेपाल पत्रकार महासंघ कैलाली अध्यक्ष हिमालय जोशीलगायत मन्तव्य व्यक्त करले रहैं ।

उ अवसरमे स्वास्थ्य निर्देशनालय डोटीके पूर्व स्वास्थ्य निर्देशक डा. गुणराज अवस्थीहे खोप तथा सुदूरपश्चिम प्रदेशमे स्वास्थ्य क्षेत्रमे महत्वपूर्ण योगदान करल वाफत कदरपत्रसहित सम्मान करल रहे । यी आघे जिल्लाके सक्कु १३ ठो स्थानीय तहहे पूर्णखोप सुनिश्चितता तथा दिगोपना घोषणा होसेकल बा ।

१५ महिनाभित्रे बालबालिकाहे १३ ठो रोगविरूद्धके टमान १४ ठो खोप लगाइ परना स्वास्थ्य कार्यालय कैलाली जनैले बा ।

जिल्ला समन्वय समिति एवं जिल्ला पूर्णखोप समन्वय समितिके संयोजक पदमबहादुर कलेलके अध्यक्षतामे हुइल कार्यक्रममे कैलालीमे सक्कु पालिकाके जनप्रतिनिधि ओ स्वास्थ्य शाखा प्रतिनिधिहुनके सहभागिता रहल रहे ।