सामाजिक विकास कार्यालयके प्रगति ९४.६१ प्रतिशत

पहुरा समाचारदाता
धनगढी, ३२ असार । सुदूरपश्चिम प्रदेशके धनगढीस्थित सामाजिक विकास कार्यालयसे आर्थिक बर्ष २०७८÷०७९ सालमे सञ्चालित कार्यक्रमके विवरण सार्र्वजनिक करटी ९४.६१ प्रतिशत प्रगति हुइल जनैले बा ।

उ कार्यालयसे शुकके रोज धनगढीमे चालु आर्थिक बर्षके समिक्षा करटी ९४.६१ हुइल जनागिल हो । साामाजिक विकास कार्यालयके निमित्त कार्यालय प्रमुख कुलराज सोती चालुओर ९३.६२ प्रतिशत, पुँजीओर ९४.६७ प्रतिशत रकम खर्च कैना सफल हुइल जनैलै । ओस्टेक करके राष्ट्रिय यूवा परिचालन कार्यक्रमके आइल बजेटमे ९९.३५ प्रतिशत ओ विद्यालय सुधार क्षेत्र कार्यक्रमके लाग छुटयाइल बजेटमे ९८.९३ प्रतिशत खर्च हुइल उहाँ जनैलै ।

उहाँ अनुसार १९५ योजनामन्से १८६ योजना कार्यान्वयन हुइल प्रगती विवरण प्रस्तुत करल रहिट । टमान प्राविधिक कारणसे चालु आर्थिक वर्षमे ९ ठो योजना कार्यान्वयनमे आई नइसेकल उहाँ बटैलै । कैलालीके १३ ठो स्थानीय तहमे उ योजना समाहित हुइल रहिट ।

कैलालीके कैलारीमे ४, चुरेमे ८, जानकीमे ८, जोशीपुरमे ६, बर्दगोरियाकमे, ६, मोहन्याल गाउँपालिकामे ९, गोदावरी २१, गौरीगंगामे ३१, घोडाघोडीमे १९, भजनीमेृ १०, टीकापुरमे ३० ओ लम्कीचुहा नगरपालिकामे १४ तथा धनगढी उपमहानगरमे २९ ठो करके १९५ ठो योजना चालु आर्थिक वर्षमे छनौट हुइल रहिट ।

उ कार्यालयसे सामुदायिक भवन, विद्यालय भवन, मन्दिर, प्रतिक्षालय, विद्यालय मर्मत, शालिक निर्माण, शौचालय, मसानघाट, सभाहल, सूचना प्रविधि तथा संरचना सुधार लगायतके योजना कार्यान्वयन करल निमित्त पूमुख सोती बटैलै । ओस्टेक करके खेलमैदान, आइसिटि ल्याब व्यवस्थापन, आश्रम, गोदाम घर, घेरपर्खाल, छात्रावास, नाली निर्माण, तटबन्ध, वाल उद्यान, पुस्तकालय लगायतके योजना सम्पन्न करल कार्यालयके प्रगति विवरणमे उल्लेख बा ।

कार्यालयसे निर्माण बाहेक विद्यालयमे विज्ञान प्रयोगशाला स्थापना, विपद् क्षति व्यवस्थापन विद्यालय पुनःनिर्माण, क्याम्पस आसिटि व्यवस्थापन, क्याम्पसमे ईलाइब्रेरी निर्माण करके १६ ठो योजना सम्पन्न करले बा ।

कार्यालयसे क्षमता विकासओर महिलाके लाग लोक सेवा तथा शिक्षक सेवा तयारी कक्षा, महिला सशक्तिकरण, अपांगता हुइल हुकनके लाग आयआर्जन तालिम, राजी वादी सोनाहा समुदायके लाग आयआर्जन तालिम, असल अभिभावकत्व सम्बन्धी तालिम, स्थानीय तहसँगके साझेदारीमे बालबालिका सम्बन्धी कार्ययोजना निर्माण ओ बालबालिकाके लाग आत्मरक्षा तालिम सम्पन्न करल जनैले बा । प्रगति विवरण सार्वजनिक विवरण कार्यक्रमके सहभागिसे वितरणमुखी बजेट डेना प्रक्रिया रोके पर्ना सुझाव डेहल रहिट । रकमके अख्तियारी समयमे अइलेसे ढेर काम करे सेक्ना सहभागिके जोड रहे ।

ओस्टेक, मन्दिर, चर्चमे विनियोजना हुइना बजेट रोक्न समेत आग्रह करल रहिट । ओस्टेक करके निर्माण सामग्रीके मूल्य बढटी गैलेसे बजेट भर नइबढ्न गुनासो करले रहिट ।

प्रगति विवरण सार्वजनिक कार्यक्रममे सुदूरपश्चिम प्रदेश सामाजिक विकास मन्त्रालयके सचिव दीपक लामिछानेले सामाजिक विकास कार्यालयले चालु आर्थिक वर्षममे सम्पन्न करल योजनाके प्रगति नमूनाके रुपमे रहल बटैलै । उहाँ अइना आर्थिक वर्षमे समयमे अख्तियारी प्रदान कैना मन्त्रालय लागल बटैलै ।