व्यवसायिक सेवा प्रदायक संजाल निर्माण सम्बन्धी अन्तरक्रिया

पहुरा समाचारदाता
हसुलिया, २ साउन । कैलालीके कैलारी गाउँपालिका–८ पृथ्वीपुरमे सोम्मार व्यवसायिक सेवा प्रदायक संजाल निर्माण सम्बन्धी अन्तरक्रिया कार्यक्रम हुइल बा ।

दिगो विकास समाज भजनी कैलालीके आयोजना तथा वल्र्ड भिजन इन्टरनेशनल नेपालके साझेदारीमे हुइल कार्यक्रममे वडका पहुना कैलारी गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे उहाँ गाउँपालिका स्तरीय व्यवसायिक सेवा प्रदायक संजाल निर्माण हुई पर्नामे जोड डेहल रहिट । संजाल निर्माण हुइलेसे यहाँ संचालित टमान व्यवसायके बजारीकरणमे सहयोग पुग्नाफे उहाँ बटैली ।

दिगो विकास समाजके सहसचिव धनिराम राजीके अध्यक्षतामे हुइल कार्यक्रममे गाउँपालिकाके सामाजिक विकास अधिकृत यगम कलेल, पशु शाखा प्रमुख सुर्य चौधरी, वडा–८ के अध्यक्ष तारामल कठरिया, वडा सदस्य, टमान व्यवसायिक सेवा प्रदायक संस्थाके प्रतिनिधिहुकनके सहभागिता रहल रहे ।

कार्यक्रममे सहजीकरण आर्थिक पुनस्र्थापना परियोजनाके संयोजक आशिष उपाध्याय करले रहिट । कलेसे संचालन दिगो विकास समाजके फिल्ड सहजकर्ता मुकेश चौधरी करले रहिट ।