करेन्ट लागके घाहिल केदार चौधरीके उपचारार्थ आर्थिक सहयोग

पहुरा समाचारदाता
धनगढी, ५ सावन । कैलालीमे विद्युत लाइन मर्मत कैना क्रममे घाहिल हुइल केदारनाथ चौधरीहे आर्थिक सहयोग करल बा ।

करेन्ट लागके घाहिल हुइल चौधरीहे कैलारी उद्योग वाणिज्य संघ ओ हसुलिया बजार व्यवस्थापन समितिसे उपचारके लाग बिफेक रोज आर्थिक सहयोग करल हो ।

गैल असार ३० गते हावाहुरी सहितके वर्षा हुइबर कैलारी गाउँपालिकाके विद्युत् लाइनमे क्षति हुइल रहे । उहे लाईन बनैना क्रममे करेन्ट लागके घाहिल हुइल चौधरीके काठमाडौँके कृर्तिपुर अस्पतालमे उपचार हुइटी रहल बा । कैलारी गाउँपालिका वडा नम्बर १ हसुलियाके केदारनाथ चौधरीके उपचारार्थ ३३ हजार ४ सय ७१ आर्थिक संकलन कैके सहयोग करल कैलारी उद्योग वाणिज्य संघके अध्यक्ष नेपालु चोधरी बटैलै ।

चौधरीके उपचारके लाग हसुलिया बजारके सक्कु व्यापारी तथा स्थानीयसे रकम संकलन करल अध्यक्षु चौधरी बटैलै ।‘घाहिल चौधरी हमार गाउँके स्थानीय हुइट् । उहाँ लम्मा समयसे इ क्षेत्रके विद्युत् सेवामे कार्यरत बाटै’, चौधरी कहलै, ‘सामाजिक उत्तरदायीत्व कायम रख्टी मानवताके नाता सहयोग करल हुइटी । आवश्यक परलेसे थप सहयोगके लाग पहल करब ।’

बिफेक रोज कैलारी उद्योग वाणिज्य संघ ओ हसुलिया बजार व्यवस्थापन समितिके प्रतिनिधीहुक्रनके उपस्थितिमे घाहिल चौधरीके बाबा कुकरु चौधरीहे रकम हस्तान्तरण करल हो ।