रुढीवादी परम्परा छाउप्रथाहे प्रश्रय डेहलः सामाजिक राज्यमन्त्री रैका
पहुरा समाचारदाता
धनगढी, ५ सावन । सुदूरपश्चिम प्रदेशके सामाजिक विकास राज्यमन्त्री टेकबहादुर रैका रुढीवादी परम्पराके अन्त्य नैहुइटसम छाउप्रथामे परिर्वतन नैहुइना बटैले बटैं ।
बिफेक रोज धनगढीमे हुइल मर्यादित महिनावारीके लाग धामी–झाक्री सम्मेलनमे राज्यमन्त्री रैका धर्मके टमान गथ्रमे कहुँ फेन उल्लेख नैरहल बाटहे समाज प्रश्रय डेहल बटैलैं । ‘प्राकृतिक रुपमे हुइना महिलाहुकनके महिनावरीहे समाजके गलत बुझाई रहल ओरसे पीडा भोगल बटैं, उहाँ कलैं, ‘धामी–झाँक्रीके विश्वास टमानमे रहल ओरसे सहि सन्देश प्रवाह करना आवश्यक बा ।’
कार्यक्रममे गुड नेबर्स नेपाल संस्थाके निर्देशक जेकिन रोन, संविधान सभा सदस्य हरि श्रीपाईली, दिपायल–सिलगढी नगरपालिकाके उपमेयर कलावती महरा साउँद, बाजुरा वडीमालिका नगरपालिकाके विमला थापालगायत मन्तव्य व्यक्त कररले रहैं ।
कार्यक्रममे बाजुरा, अछाम, डोटी, मुग ओ कैलालीके ३५ जाने धामी, झाक्री लगायत टमान स्थानीय तहके प्रमुख, उपप्रमुखसमेत सहभागी रहैं । कार्यक्रम गुड नेबर्स ओ कोइकाके आयोजनामे हुइल हो । धामी–झाँक्री सम्मेलन कार्यक्रम ३ दिन सम सञ्चालन रहि ।
