कोरोना फेरसे बह्रटा सावधानी अपनाई
कोरोना संक्रमण फेरसे बह्रे लागलपाछे चौठा चरणके संक्रमण सुरु हुइल की कना स्वास्थ्यकर्मीहुकनके अंकलन बा । पहिल चरणमे संक्रमण सुरु हुईबेर खोपके अभाव रहल । यी चरणमे ढेर जानेक ज्यान नइगिलेसेफे मुलुक नम्मा समयसम बन्दाबन्दीके सामाना करे परल । जिहीसे यहाँके अर्थतन्त्र धारापमे परल । विद्यार्थीहुक्रे पह्राईसे बञ्चित हुई पर्ना अवस्था रहल । मुलुक भयावाह अवस्थामे जनजीवन गुजारे परल ।
पहिल चरणके कोरोना संक्रमणसे भेटागिल दुःख अनुसार सावधानी अपनाई नइसेकलपाछे दुसरा चरमके संक्रमण हुईबेर असोचनिय धनजनके क्षति हुई पुगल । यी अवधिमे अक्सिजनके असिक अभाव हुइलकी अक्सिजन विना ढेर व्यक्ति अकालमे ज्यान गुमाई परल । संक्रमण रोकथाम कैना हम्मे हम्मे परल । स्थास्थ्य क्षेत्र, स्वाथ्यकर्मी अस्तव्यस्त रहल बा । टिसरा चरणमके कोरोना संक्रमण सुरु हुइबेर ओटरा ढेर क्षति टे नइपुगाइल मने टमान व्यक्तिके ज्यान गैल बा । टिसरा चरणसम पुगटसम सरकार कोरोनाके बुस्टर डोजसमके खोपके व्यवस्था करेबेर बहुट जाने खोप नइलगाके लापारवाही करल डेखगिल । नेपालमे अभिनसम बहुट जाने कोरोनाके खोप नइलगैले हुइट । कोरोना खोपके व्यवस्था सरकार निशुल्क कैलेसेफे तीन चरणके खोपसे बहुट जाने बन्चित बटै । अब्बेटे लर्कनमे खोपके व्यवस्था कैसेकल बा । मने हम्रे काहे लापारवाही कैना टे ।
अब्बे फेरसे संंक्रमण फैलल कहटी स्वास्थ्य तथा जनसख््या मन्त्रालय भीडभाड नइकैना ओ सावधानी अपनैना सक्कु जनहनहे आग्रह करले बा । मन्त्रालयसे विज्ञप्ती जारी करटी भीडभाड हुइना स्थानमे अनिवार्य मास्क ओ सेनिटाइजरके प्रयोग करे परल । सक्कु सरकारी, गैरसरकारी कार्यालय तथा मनैनके भीडभाड हुइना स्थानमे अनिवार्यरूपमे मास्कके प्रयोग कैना करैना तथा प्रवेशद्वारममे सेनिटाइजरके व्यवस्था मिलाई परल । विमानस्थल, हवाई लगायत सार्वजनिक यातायातमे मास्क अनिवार्य प्रयोग कैना करैना तथा सेनिटाइजरके व्यवस्था कैना करैना, गोष्ठी, सेमिनार, बैठकजैसिन भीडभाड हुइना कार्यक्रममे मास्कके प्रयोगहे अनिवार्य कैना ओ सेनिटाइजरके व्यवस्था मिलैना जरुरी डेखल बा । विद्यालय, विश्वविद्यालय, धार्मिक स्थल, भीडभाड हुइना प्रकृतिके व्यावसायिक तथा मनोरञ्जनस्थल, रंङशाला आदिजैसिन सार्वजनिकस्थलमे मास्कके अनिवार्य प्रयोग कैना, स्वास्थ्य संस्थासे संक्रमण रोकथाम नियन्त्रण तथा उपचार व्यवस्थापनके लाग आवश्यक व्यवस्थापन कैना करैना चाही ।
कोभिड–१९ विरुद्धके खोप कार्यक्रमहे प्रभावकारीरूपमे सञ्चालन कैटी खोप लगैना बाँकी रहल सक्कु खोप लगैना अनिवार्य हुइल बा । अन्तर्राष्ट्रिय हवाई तथा स्थलगत प्रवेश नाकामे निगरानी थप बल्गर, प्रभावकारी बनैना, भीडभाड हुइना स्थानमे कोभिड–१९ नमूना परीक्षण अभियान सञ्चालन करके समुदायस्तरमे कोभिडके अवस्थाहे थप विश्लेषण करटी प्रभावकारी कदम चल्ना जरुरी बा । नेपालीहुकनके बानी पहिले पाइल दुःखके विस्रा डरना, लापारवाही कैना, कर्रा परलपाछे केल छटपटैना करजाइठ । महामारीके प्रकोप जबफे आइसेकठ टबमारे कर्रा अवस्था अइनासे बाँचेक लाग पूर्वतयारी करटी अब्बेसे सचेत हुइना जरुरी बा ।
