एसपीएके विधार्थीहे बहराईनमे रोजगारीके अवसर

पहुरा समाचारदाता
धनगढी, ८ सावन । धनगढीके सुदूरपश्चिमाञ्चल एकेडेमी (एसपीए) कलेजके दुई विधार्थी बहराईनके एक फाइभस्टार(पाँच तारे) होटलमे पेड इन्टनसिप–तलबसहितके इन्टनसिपके अवसर पैले बाटै । बहराइनके विश्वप्रशिद्ध पाँचतारे होटल क्राउन प्लाजा एचजी होटलमे एसपीएके बीएचएम–ब्याचलर इन होटल म्यानेजमेन्ट)मे अध्ययनरत् पवन भाट ओ प्रकाश बोहरा पेड इन्टनसीपके अवसर पाइल हुइट ।

कलेजसे उहाँहुक्रनहे १ बरसके लाग उक्त अवसर जुटाडेहल हो । बीएचएम पहिल ब्याचके उहाँहुक्रे उक्त अवधिमे कलेजमे पह्रल विषयवस्तुहे सिक्नाके साथे वहाँँ आकर्षक आम्दानी फेन कैना बाटै । इन्टनसीप अवधि ओरैटी किल उहाँहुक्रे उक्त होटलमे काम करे पैना बाटै । २७८ कोठायुक्त पाँच तारे उक्त होटलमे बहराइन अन्तर्राष्ट्रिय एयरपोर्टसे १५ मिनेटके दूरीमे रहल बा । बहराईनके मुख्य कुटनीतिक निकाय, दूतावास, बैंक, व्यापारिक प्रतिष्ठान रहल क्षेत्रमे अवस्थित उक्त होटल सबसे ब्यस्तमध्येके एक हो ।

उहाँहुक्रे पाँचतारे होटेलमे काम करल अनुभव रहल ओरसे चाहद बेला औरे देशके अन्य लक्जरिएस होटलमे आकर्षक तलब सुविधासहित काम कैना अवसर पैना बाटै । एसपीएके क्याम्पसप्रमुख योगराज उपाध्याय ओ बीएचएम कार्यक्रम निर्देशक डिल्लीराज भण्डारी शनिच्चरके क्याम्पसमे एक कार्यक्रमके बीच डुनु जनहनहे विदाई करल रहिट । बिदाई कार्यक्रममे क्याम्पस प्रमुख उपाध्याय विधार्थीहुक्रनहे आगामी जीवनके शुभकामना डेटी एसपीएसे विधार्थीहे अध्ययनसँगसँगे उहाँहुक्रनके भविष्यके फेन सुनिश्चितता कैना बटैलै ।

हम्रे विधार्थीनहे संस्कार ओ अनुशासनयुक्तसँगसँगे पसिना ओ कर्ममे विश्वास कैना बनैबी,’ क्याम्पस प्रमुख उपाध्याय कहलै, ‘उहे कारण हमार विधार्थी दुबई, बहराईन, भारत, नेपालके होटलमे इन्टर्नके रुपमे काम कैटी कैटी मजा आम्दानी फेन करटी रहल बाटै । एसपीएके विधार्थीनके लगाव मिहिनेतके कारण उ होटलमे विधार्थी उच्च सम्मान ओ महत्व फेन पैले बाटै ।’

सुदूरपश्चिममे बीएचएमके लाग अपने छुट्टे आधुनिक सम्पूर्ण स्रोत साधानयुक्त ल्याब, किचेन, बेकरी, बार, रेस्टुरेन्ट, हाउस किपिङ रहल शैक्षिक संस्था हो । एसपीएके बीएचएम कार्यक्रम निर्देशक डिल्लीराज भण्डारी विधार्थीनहेबधाई डेटी उहाँहुक्रनहे विश्वप्रशिद्ध होटलमे काम कैना अवसर पैना उहाँहुक्रनके भविष्य सुनिश्चित हुइल आधार रहल बटैलै ।