‘रेशम मुद्दा हो पहिचान हो’
अगहन ४ गते हुइना संघ ओ प्रदेश चुनावके तयारी तीव्र
पहुरा समाचारदाता
हसुलिया, ११ सावन । नागरिक उन्मुक्ती पार्टीके प्रवक्ता दामोदर पण्डित माननीय रेशम चौधरी मुद्दा ओ पहिचान रहल बटैले बटै ।
मंगरके रोज हसुलियामे नागरिक उन्मुक्ती पार्टी कैलारी गाउँपालिकासे आयोजना करल कार्यकर्ता भेटघाट प्रशिक्षण तथा पार्टी प्रवेश कार्यक्रममे उहाँ बाट बटवाइल रहिट ।
थारु समुदायसे बनाइल ढकिया थारुनके लाग पहिचान हो, परिचय हो, मुद्दा हो,’ पार्टी प्रवक्ता पण्डित कहलै,–‘थारु समुदायके अलग पहिचान बा, खानपान, संस्कृति, सम्वत बा । यिहीहे कबु नविस्राई ।’
अपन पहिचान जोगाइक लाग लागि ।’ अपन संस्कृति नछोरी, पुर्खनके सिखाइल परम्परा नविस्राई प्रवक्ता कहलै ।
केन्द्रीय अध्यक्ष रन्जिता श्रेष्ठ चौधरी टीकापुर घटना राजनितिक घटना रहल बटैली । उहाँ कहली, थारु समुदाय अपन पहिचान, हक अधिकारके लाग आन्दोलन करल मने घटना घटेबेर झुुठा आरोपके मुद्दामे थारुनहे जेलमे कोचल बटैली । थारु हुइलक कारण जेलमे बैठे परल अध्यक्ष रन्जित कहली । नागरिक उन्मुक्ती पार्टी खुलल कम समयमे कैलालीमे भारी फडको मारल ओरसे संघ ओ प्रदेशमे उहीसे दोब्बर फडको मरना उहाँ दाबी करली ।
स्थानीय चुनाव आघे कोईफे विश्वास नइकैना मने चार पालिकाके प्रमुख सहिट ९९ सित आइलपाछे भारी पार्टीसे अब्बे डाह करल उहाँ बटैली । हमार पहिचानहे स्थापित करेक लाग फेरसे ढकियामे भोट डरना उहाँ आग्रह करली ।
कार्यक्रममे पार्टीके केन्द्रीय सदस्य लक्ष्मण थारु, इन्दु थारु, गंगा चौधरी, अरुण चौधरी, खुशीराम चौधरी लगागत मन्तव्य व्यक्त करले रहिट । कार्यकर्ता भेटघाट प्रशिक्षण तथा पार्टी प्रवेश कार्यक्रममे टमान पार्टी छोरके ४ सय १३ जाने नागरिक उन्मुक्ती पार्टीमे प्रवेश करले बटै । कैलारी–८ निवर्तमान वडा अध्यक्ष दुःखीराम कठरियाफे माओवादी पार्टी छोरके नागरिक उन्मुक्ती पार्टीमे प्रवेश करले बटै ।
कार्यक्रममे टमान कलाकारहुकन सम्मान कार्यक्रमफे कैगिल बा । संघ ओ प्रदेशके चुनावहे लक्षित करके सुदूरपश्चिमके कैलाली कञ्चनपुर लगायत और प्रदेशमेफे यी पार्टी कार्यकर्ता भेटघाट प्रशिक्षण तथा पार्टी प्रवेश कार्यक्रममे तिव्र बनैले बा । ओस्टेक करके भजनीमे हुइल कार्यक्रममे ७ सय ११ जाने नागरिक उन्मुक्ती पार्टीमे प्रवेश करल केन्द्रीय सदस्यीय गंगाराम चौधरी बटैलै ।
