शनिच्चरसम वर्षाके सम्भावना
पहुरा समाचारदाता
धनगढी, १२ सावन । अइना शनिच्चरसम देशभर आंशिकसे सामान्य बदली रहिके अधिकांश स्थानमे वर्षा हुइना बा ।
मनसुन सक्रिय रहल ओरसे शनिच्चरसम देशभर आंशिकसे सामान्य बदली रही देशके अधिकांश भूभागमे हल्कासे मध्यम वर्षाके सम्भावना रहल जल तथा मौसम विज्ञान विभाग जनैले बा ।
हाल मनसुनके न्यून चापीय रेखा पश्चिममे सरदर स्थानके आसपासमे रहल बा कलेसे पूर्वमे सरदर स्थानसे कुछ उत्तरओर अवस्थित रहल बा ।
विभागसे अइना २४ घण्टा देशके कुछ स्थानमे मेघगर्जन÷चट्याङसहित हल्कासे मध्यम वर्षाके साथे प्रदेश नं १, वाग्मती, गण्डकी ओ लुम्बिनी प्रदेशके एक वा दुई स्थानमे भारी वर्षाकेफे सम्भावना रहल तथा उ भू–भागमे भू–क्षय, पहिरो तथा गेग्रान बहावके जोखिम हुइनाके साथे लडिया नाला तथा खहरे खोलामे पानीके सतह बह्रे सेक्ना तथा दैनिक जनजीवन÷यातायात क्षेत्रसमेत प्रभावित हुई सेक्ना हुइल ओरसे सतर्कता अपनैना सक्कुहुनमे अनुरोध करल बा ।
रातके समयमे देशभर आंशिकसे सामान्य बदली रहिके देशके कुछ स्थानमे मेघगर्जन/चट्याङसहित हल्कासे मध्यम वर्षाके सम्भावना रहल बा । प्रदेश नं १, मधेस प्रदेश ओ वाग्मती प्रदेशके एक वा दुई स्थानमे भारी वर्षाके फे सम्भावना रहल बटाइल बा ।
