वडा सदस्यके निधन, गाउँपालिकासे शोक विदा

पहुरा समाचारदाता
हसुलिया, १३ सावन । कैलालीके कैलारी गाउँपालिका–७ के वडा सदस्य एवम् गाउँपालिकाके गाउँ सभा सदस्य ४२ वर्षीय उमेशकुमार चौधरीके निधन हुइल बा ।

कैलारी गाउँपालिका–७ भुईयाँफाँटा निवासी उहाँक काल्ह साँझ निधन हुइल हो । पसलमे बैठके बाटचित कैना क्रममा एक्कासी अचेत डेखल चौधरी ओकरपाछे नइउठल वडा अध्यक्ष एवम् गाउँपालिकाके प्रवक्ता दीपेन्द्र बहादुर बम जनैलै । उहाँक अनुसार वडा सदस्य चौधरी उच्च रक्तचापके बिरामी रहिट । उहाँ रक्तचापके औषधि सेवन करटी आइल रहिट । अचेत अवस्थामे रहल उहाँके हसुलियाके मिरार अस्पतालमे नानल रहे । वडा सदस्य चौधरीके उहे निधन हुइल प्रवक्ता बम बटैलै ।

गाउँ सभा सदस्यके निधन हुइलपाछे कैलारी गाउँपालिकाभर आज शोक बिदा करल बा । गाउँपालिका, वडा कार्यालय, स्वास्थ्य संस्था, विद्यालयमे एक दिन शोक बिदा करल प्रवक्ता बम जानकारी डेलै । उहाँ वडासे एक कुशल समाजसेवी गुमाइल उल्लेख कहटी आज बैठल कार्यपालिका बैठकसे शोक प्रस्ताव पारित करले बा ।
भर्खर हुइल स्थानीयतह निर्वाचनमे नेपाली काँग्रेसके निर्वाचित चौधरी नेपाली काँग्रेस कैलाली क्षेत्र नम्बर ३ के पूर्व क्षेत्रीय सदस्यफे रहिट ।