रानाथारु समुदायके सामनके डोला उदघाटन

संस्कृति परम्परा पुस्तान्तरण आवश्यकः उपाध्यक्ष चौधरी

पहुरा समाचारदाता
हसुलिया, १४ सावन । कैलालीके कैलारी गाउँपालिका उपाध्यक्ष भगवतीकुमारी चौधरी रानाथारु समुदायहुकन लोप हुइटी रहल कला, संस्कृति ओ परम्पराहे पुस्तान्तरण करे पर्ना बटैले बटी ।

शनिच्चरके रोज कैलारी–९ गदरियामे सामनके डोला उदघाटन कार्यक्रममे बोल्टी उहाँ परम्परासे चल्टी आइल महत्वपूर्ण टरटिहुवार, कला, संस्कृतिहे बचाइक लाग पुस्तान्तरण करे पर्ना बटैले रही ।
आदिवासी जनजाति थारु, रानाथारू समुदाय कला, संस्कृतिके धनी समुदाय हुइटी,’ उपाध्यक्ष चौधरी कहली, ‘पुरान गीतबाँस, कला, संस्कृति जानलबुझल पुर्खा ओरैटी जाइटै । लौवा पिढीहे परम्परासे चल्टी आइल ज्ञानगुन ओटरा पत्ता नइहो । उहीहे जिवित राखेक लाग पुस्तान्तरण आवश्यक बा ।’

कार्यक्रमके वडका पहुना रहल उहाँ थारु, रानाथारू समुदायके कला, संस्कृति संरक्षणके लाग लक्षित वर्गके कोषसे बजेट विनियोजन कैनाफे बटैली ।

कैलारी गाउँपालिका वडा नम्बर ६ के अध्यक्ष प्रेमबहादुर चौधरी रानाथारु समुदायके पहिरन, कला, संस्कृति लोप हुइटी गैल बटैले बटै । रानाथारुके पहिचान कलेक भेषभुषा, कला, संस्कृति हो, यिहीहे संरक्षण करे नइसेक्लेसे पहिचान हेरैना उहाँ बटैलै ।

कार्यक्रममे यूवराज राना कैलारी गाउँपालिकाके वडा नम्बर ९ मे केल रानाथारु समुदायके बस्ती रहल ओरसे यिहीसे संरक्षण कैना आग्रह करलै । उहाँ कहलै, हम्रे गाउँपालिकामे अल्पसंख्यक बटी । कला, संस्कृति संरक्षणके लाग यहाँ संग्राहलय निर्माण आवश्यक बा ।’ गाउँपालिकाभिटर अल्पसंख्यक समुदायमे पर्ना ओरसे विशेष सुविधाके व्यवस्था कैनाफे उहाँ माग करलै ।

गदरिया गाउँक स्वम सेविका विरश्रमा रानाके अनुसार यी पर्वमे लउण्डी तथा जन्नी मनै निराहार ब्रत बैठना करठै । ‘यी पर्व रानाथारु डिडीबहिनीयाहुकनके लाग सबसे महत्वपूर्ण हो ।दुःख बिमार हुइलेसेफे चेलीबेटी लैहर जैना, मिठा मिठ खैना, बल्हा (डोला) झुलके रमैटी तिज मनैठै, उहाँ कहली, ‘डाडुभैया ओ भतिजवाके दीघार्युके कामना करटी निरहार ब्रत बैठना करल बटै ।’ यी पर्वमे लैहर पक्षसे डिडीबहिनीयाहे दान, दक्षिणा डेना प्रचलनफे बा ।

गदरिया गाउँ बुद्धिजीवि पडडु राना सावनके पूर्णिमासे बल्हा (डोला)के सुरुवात करटी तृतीयाके दिन तीज पर्व विधिवत रुपमे समापन हुइना बटैलै । सावनके पूर्णिमाके दिन सक्कु सामग्री जुटाके गाउँघरके डाडुभैया मिलके डिडी बहिनीयाके लाग बल्हा (डोला) बनाडेना चलन रहल उहाँ बटैलै । रानाथारु बस्तीके कौनो चोक वा केक्रो घर बल्हा (डोला)के व्यवस्था करजाइठ राना कहलै ।

बल्हा (डोला) झुल्टी डिडीबहिनीया दीर्घायुके कामना करठै, उहाँ कहलै, ‘तृतीयाके दिनमे रानाथारुके मौलिक परिकार पकैठै । साँझ बल्हा (डोला)मे लगाइल डो¥या काटके लडियामे लैजाके पूजापाठ करके बिर्सजन करठै ।’
उहाँक अनुसार उ दिन महिला निराहार बैठके प्रसादके रुपमे परम्परागत खैनाचिज सिमही, पपरा, पुरी, गुलगुला खैठै । भोज हुइल ओ नइहुइल महिला बल्हा (डोला)के डो¥या काटके लडियाके बीच भागमे पुगके बत्तीसंगे विर्सजन कैना चलन बा ।

सामनके डोला उदघाटन कार्यक्रममे गदरियाके स्थानीय भोले रानाथारु गाउँपालिकासे सिलाई कटाई, सीपमुलक तालिमके व्यवस्था करडेना माग करले बटै ।

वडा नम्बर ९ के वडा सदस्य तथा बेलडंगा सामुदयिक वन उपभोक्ता समुहके अध्यक्ष धनबहादुर रानाके अध्यक्षतामे हुइल कार्यक्रममे स्वागत मन्तव्य रामचन्द्र राना ओ संचालन लक्ष्मी राना करले रहिट । सामनके डोला उदघाटन कार्यक्रममे पाछे उपाध्यक्ष भगवतीकुमारी चौधरी रानाथारु समुदायके महिला डिडीबहिनीयाहुकनसंग डोला डोलके साथ डेहल रही । कार्यक्रमके आयोजना बेलडंगा सामुदयिक वन उपभोक्ता समुह करले रहे ।

कार्यक्रममे कैलारी गाउँपालिकाके योजना शाखा प्रमुख सन्तोषकुमार चौधरी, वडा नम्बर ५ वडा सदस्य अनारकली चौधरी, वडा नम्बर ३ के वडा सदस्य शकुन्तला चौधरी, कैलारी गाउँपालिका उपाध्यक्षके स्वकीय सचिव कृष्ण चौधरी, गदरिया गाउँक स्थानीय महिला डिडी बहिनीयाहुकनके उपस्थिति रहे ।

सुदूपश्चिम प्रदेशके कैलाली ओ कञ्चनपुर दुई जिल्लामे बसोबास कैना रानाथारुहुकनके विशेष तिज पर्व सावन १५ तिज हो । तिज पर्वके अवसरमे कञ्चनपुर जिल्लाके पुनर्वास नगरपालिका, बेलौरी नगरपालिका, कृष्णपुर नगरपालिका ओ लालझाडी गाउपालिका आज सार्वजनिक विदा डेले बा ।