भाषा, कला, संस्कृति प्रदेशके पहिचान होः राज्यमन्त्री रैका
पहुरा समाचारदाता
धनगढी,१५ सावन । नेपाली काँग्रेसके महासमिति सदस्य एंव सुदूरपश्चिम प्रदेश सरकारके सामाजिक विकास राज्यमन्त्री टेकबहादुर रैका सुदूरपश्चिमके मुख्य चाडपर्व,परम्परा, भाषा,कला संस्कृति प्रदेशके पहिचान रहल बटैलै ।
सुदूरपश्चिमके कैलाली ओ कञ्चनपुरमे बसोबास कैना रानाथारु समुदायके पर्व तीजके अवसरमे अँटवार शुभकामना सन्देश डेटी राज्यमन्त्री रैका उ बाट बटाइल रहिट । सन्देशमे राज्यमन्त्री रैका सुदूरपश्चिममे मनैना सक्कु समुदायके मुख्य पर्व ओ संस्कृतिके संरक्षण, सम्बद्र्धन ओ विकासमे प्रदेश सरकारसे सहयोग ओ सहकार्य कैना बटैलै । उहाँ राना समुदायके विशेष पहिचान संस्कृति ओ परम्पराके संरक्षणमे समेत अपने सहयोग कैना बटैलै । रानाथारु समुदायके अलगे विशेषता बोकल तीज और समुदायसे फरक तरिकासे रानाथारु समुदायके डिडी बहिनीया मनैना करठै ।
यी पर्व विशेष करके रानाथारु डिडीबहिनीयाहुक्रे अपन भैया भतिज्वाके नम्मा दिर्घायुके लाग व्रत बैठना करठै । तीजमे १५ दिन आघेसे डोला अर्थात पिङ डारके डिडीबहिनीयाहुक्रे अपने मौलिकता विशेषके गीत गाके सामनके डोल डोल्टी मनैना करल रानाथारु समाजके अगुवा नन्दलाल राना बटैलै ।
