जीवित रहटसम निर्मलाके न्यायके लाग लरमः रवि लामिछाने

कञ्चनपुर, १५ सावन । पूर्व सञ्चारकर्मी तथा राष्ट्रिय स्वतन्त्र पार्टीके केन्द्रीय सभापति रवि लामिछाने निर्मला पन्तके न्यायके लाग अपने जीवित रहटसम लरटी रना बटैले बाटै ।

पार्टीके जिल्ला भेलाहे सम्बोधनके लाग महेन्द्रनगर पुगल लामिछाने स्वर्गीय निर्मला पन्तके डाइ दुर्गा पन्तहे भेट्के अइसीन बटाइल हुइट । लामिछाने दुर्गा पन्तहे भेटके कहलै चिन्ता नकरहो, “मै डगरा फेरल किल हुइटुँ, बाचा फरल नैहुइटु । अपने जीवित रहटसम निर्मला न्याय पैना आशहे अन्त्य हुइ नैडेबु । इ बेर नेतृत्व कैके , अपराधीहे सजाय नैडेह्वाके आराम कैके नैबैठम ।”

यहोर राष्ट्रिय स्वतन्त्र पार्टीके संयोजक रवि लामिछानेहे कञ्चनपुरके पत्रकार खेम भण्डारी कञ्चनपुर–३ से संसदीय निर्वाचनके उम्मेदवार हुइना सुझाव डेले बाटै । भण्डारी आपन सामाजिक सञ्जाल फेसबुक मार्फत लामिछानेहे कञ्चनपुर ३ से उम्मेदवारी डेना सुझाइल हुइट । निर्मला पन्तके बलात्कार ओ हत्या प्रकरणपाछे लामिछानेके भूमिका गलत रहल ठहर कैटी उहाँ आत्मरक्षा करे पर्ना फेन बटैले बाटै ।

भण्डारी लामिछानेहे अपराधी ओ मतियारके पक्षमे अपने भूमिका करल स्विकार कैना समेत आग्रह करले बाटै । कञ्चनपुर–३ निर्मला पन्तके हत्या हुइल क्षेत्र हो ।

‘निर्मलाके न्याय–हरणके राज्य षडयन्त्रमे अपनेक भूमिकाबारे छातीमे हात ढारके आत्मरक्षा कैबी । अपराधी ओ मतियारके पक्षमे अपने भूमिका करल स्विकार करे सेक्बी कलेसे अपनेक राजनीतिक यात्रा ओजरार हुइना बा । ओइसीन अनुभूति हुइ कलेसे तत्कालीन उखुबारीमे जाके क्षमा याचना कैबी ।’ उहाँ लिख्ले बाटै, ‘अपनहे आभिन फेन सही ओ सत्य बाटु कना लागठ् कलेसे कृपया कञ्चनपुर–३ से आपन संसदीय यात्रा सुरु कैना साहस कैबी ।’

कुछ दिन आघे भण्डारी लामिछानेसँग निर्वाचनमे उठ्ना उद्घोष करल रहिट । निर्मला पन्तके २०७५ साल श्रावण १० कञ्चनपुरके महेन्द्रनगरमे बलात्कार कैके हत्या करल रहे । हत्या हुइल ४ बरस हुइलेसे फेन अपराधी पत्ता लागल नैहो ।