थारु पत्रकार संघ पूर्णता पाइल
पहुरा समाचारदाता
धनगढी, १५ सावन । थारु पत्रकार संघ नेपालके पहिल केन्द्रीय कार्यसमितिके बैठकसे केन्द्रीय कार्यसमिति पूर्णता पैले बा ।
संघके शनिच्चरके रोज हुइल बैठकसे खाली रहलमे नियूक्त करल अध्यक्ष प्रदीप लेखी बटैलै । संघके बैठकसे केन्द्रीय उपाध्यक्षमे प्रेम चौधरी (सुदूरपश्चिम प्रदेश), जीतनारायण थनेत (गण्डकी प्रदेश), मानबहादुर चौधरी (कर्णाली प्रदेश)हे मनोनयन करले बा । ओस्टेक करके केन्द्रीय सदस्यमे शम्भु प्रसाद चौधरी (बाँके), चन्द्रीका चौधरी(कञ्चनपुर)हे मनोनयन कैगिल बा ।
नवलपुरके अमलटारीमे चैत्र २५–२६ गते सम्पन्न संघके पाँचौं महाधिवेशनसे लेखीके अध्यक्षतामे सर्वसम्मत नयाँ नेतृत्व चयन करल रहे ।
वरिष्ठ उपाध्यक्षमे सन्तकुमार चौधरी, बागमती प्रदेश उपाध्यक्ष किशोर चौधरी, उपत्यका उपाध्यक्ष सहदेव चौधरी, प्रदेश १ उपाध्यक्ष कुलदीप चौधरी, लुम्बिनी उपाध्यक्ष शम्भु चौधरी, मधेश उपाध्यक्ष प्रतिमा चौधरी चयन हुइल रहिट ।
महासचिवमे लक्ष्मी चौधरी, उपमहासचिवमे चितवनके विजय चौधरी, सचिवमे दिप्तीशिखा चौधरी, लीलानाथ गच्छदार, कोषाध्यक्षमे चितवनके कारी महतो चयन हुइल बटै । ओस्टेक सदस्यमे सवि चौधरी, धिरेन्द्र चौधरी, मनोज चौधरी, सुमित्रा चौधरी, दिनेशकुमार चौधरी, राम चौधरी, जनक चौधरी ओ नविन चौधरी, राज चौधरी चयन हुइल रहिट ।
