प्रहरी अस्पताल सञ्चालनमे
पहुरा समाचारदाता
धनगढी, १६ सावन । कैलालीके धनगढीमे सोम्मारसे प्रहरी अस्पताल सञ्चालनमे आइल बा । धनगढी उपमहानगरपालिकाके वडा नम्बर ३ मे रहल सुदूरपश्चिम प्रहरी विद्यालयके हाताभिटर उ अस्पताल खोलल हो ।
प्रदेश प्रहरी कार्यालयसे दीपायलमे सञ्चालन करल अस्पतालके शाखा धनगढीमेफे खुलल हो । सर्वसाधारणसेफे सेवा पैना करके अस्पताल सञ्चालन करल नेपाल प्रहरी जनैले बा । प्रहरीसे अस्पतालके सोम्मार नेपाल प्रहरीके महानिरीक्षक धिरज प्रताप सिंह उदघाटन करले बटै ।
अस्पतालसे प्रदेश अन्तर्गत टमान जिल्लामे प्रहरी कर्मचारी स्वास्थ्य उपचारके लाग उपत्यका पुगे पर्ना वाध्यात्मक परिस्थितीके अन्त्य करटी सरल, सहज ओ गुणस्तरीय स्वास्थ्य सेवाके उपलब्धता सुनिश्चित करडेहल ओ यिहीसे समग्र प्रहरी काम कारबाहीमे थप चुस्तता ओ प्रभावकारिता नन्ना मद्दत पुग्न विश्वास व्यक्त करलै ।
उहाँ अस्पतालमे अइना सेवाग्राहीप्रति सभ्य बोली, असल व्यवहार ओ उचित परामर्श कैना ओर अस्पताल परिवारहे विशेष सजकता अपनैना निर्देशन डेटी प्रहरी महानिरीक्षक सिंह चिकित्सकीय क्षेत्रके आधुनिक प्रविधि ओ विकासहे आत्मसात करटी अस्पतालके स्तरोन्नती ओ विकास संगठनके प्राथमिकतामे रहल बटैलै ।
नेपाल प्रहरी अस्पताल महाराजगंजके प्रमुख प्राविधिक प्रहरी अतिरिक्त महानिरीक्षक डा. आशा सिंह स्वागत मन्तव्य व्यक्त करल उ कार्यक्रममे सुदूरपश्चिम प्रदेश प्रहरी कार्यालयके प्रमुख प्रहरी नायव महानिरीक्षक मोहनकुमार आचार्य धन्यवाद ज्ञापन करल रहिट ।
उ कार्यक्रममे धनगढी उपमहानगरपालिकाके प्रमुख गोपाल हमाल, कैलाली जिल्लाके प्रमुख जिल्ला अधिकारी किरण थापा, गेटा मेडिकल कलेजके निर्देशक डा. प्रमोद जोशी लगायतसे शुभकामना मन्तव्य व्यक्त करल रहिट । उ अस्पतालसे सोम्मारसे सेवा सुरु कैना बटाइल बा । विशेषज्ञसहितके सेवा डेना उ अस्पतालसे कुछ समयपाछे शल्यक्रिया सेवा समेत प्रदान कैना योजना रहल बा । उहे अवसरमे प्रहरी महानिरीक्षक सिंह नेपाल प्रहरी स्कुलके हाताभिटर वृक्षारोपण समेत करलै ।
