‘जग्गाके लालपुर्जा बा, नक्सा नैहो’
पहुरा समाचारदाता
धनगढी, १९ सावन । हाठमे जग्गाके लालपुर्जा बा, मने नक्सा नैहो । इ समस्या हो, कैलारी गाउँपालिका वडा नम्बर ७ विपतपुर मुक्तकमैया शिविरके । विगत डेढ दशकसे बैठ्टी आइल उ ठाउँमे मुक्तकमैयाहुक्रनके हाठमे जग्गाके लालपुर्जा बा, मने आभिनसम नक्सा भर नैपाइल हुइट ।
विपते विपतसे थिचल विपतपुर बासीहुक्रनके जग्गाके नक्सा नैहोके टमान मेरिक समस्या झेल्टी आइल बाटै । नक्सा नैहोके उहाँहुक्रे जग्गाके क्षेत्रफल छुट्याइ, घर नक्सा बनाइ ओ बंैकिङ कार्य करे नैसेकल हुइट ।
शिविरके बीसराम चौधरी आपनसँग जग्गाके लालपुर्जा रलेसे फेन नक्सा आभिनसम नक्सा नैपाइल बटैलै । नक्सा नैहोके अब्बेसम आपन जग्गा हालसाविक करे ओ क्षेत्रफल छुट्याइ नैसेकल बटैलै । यकर साथे उहाँ घर नक्सा बनाइ ओ बंैकिङ कार्य समेत करे नैसेकल बटैलै ।
‘हातमे लालपुर्जा पाइल मोर १५/१६ बरस होसेकल, मने आनिसम जग्गाके नक्सा नैपैले हुइटु’,उहाँ कहलै–‘नक्सा नैहहोके हम्रहीनहे आपन जग्गाके क्षेत्रफल छुट्याइना, घर नक्सा बनैना ओ बंैकिङ कारोबार कैना समस्या हुइल बा ।’
यहोर नापी कार्यालयके लापार्वाहीसे समस्या झेले परल शिविरके स्थानीय दाउराम चौधरी बटैलै । उहाँ कार्यालयसे आपन नक्सा नै गायव करडेहलपाछे समस्या झेले परल बटैलै ।
भुमिसुधार कार्यालय कैलालीसे २५ अगहन २०६८ मे नापी कार्यालय कैलालीहे मुक्त कमैया पुनःस्थापन जिल्ला समितिसे मुक्त कमैयाहुक्रनहे वितरण करल जग्गाके नक्सा ओ फिल्ड बुक पठाइल रहे । जेम्ने साविक रतनपुर गाविस वडा नम्बर ७ के २०६३/०६४ के फिल्ड बुक २ थान ओ नक्सा १ थान पठाइल रहे ।
उ फिल्ड बुक ओ नक्सा १४ पुस २०६८ मे नापी कार्यालयमे बुझल रेकर्ड रहल बा । मने अब्बे उक्त फिल्ड बुक ओ नक्सा नै गायव हुइलपाछे झन समस्या हुइल विपतपुरबासीहुक्रे दुखेसो पोख्ले बाटै ।
यहोर नापी कार्यालय कैलालीके नापी अधिकृत नवराज अवस्थी उक्त फिल्ड बुक ओ नक्सा खोजे लगाइल बटैलै । पहिले प्रयोगमे नै आइल मने कहोँरो रहल कहटी उहाँ उ डकुमेन्ट भेटैटी किल नक्साके लाग प्रक्रिया आघे बह्रैना बटैलै ।
बिफेक रोज किल दाउराम चौधरीके अगुवाइमे जग्गाके लालपुर्जा हालसाविक कैके लावा लालपुर्जा डेहे पर्ना, ६५ घरधुरीहे उपलब्ध कराइल जग्गाधनी प्रमाणपत्र अनुसारके ब्लुप्रिन्ट ओ फाइल नक्सा उपलब्ध कराइ पर्ना माग सहित भुमीसुधार, मालपोत ओ नापी कार्यालयमे मागपत्र बुझाइल बा ।
यकर साथे पुनःस्थापना प्रक्रियाके क्रममे १३ घरधुरी मुक्तकमैया परिचय बन्ना क्रममे रहल ओरसे तत्कालीन समयमे जग्गा उपलब्ध करैलेसे फेन हालसम उहे १३ घरधुरीहे मुक्तकमैया परिचयपत्र प्राप्त कैना बाँकी रहल ओरसे मुक्त कमैयाहुक्रनहे परिचयपत्र उपलब्ध करैनाके साथे कागजमे लिखके डेहल चुट्काके सट्टा वास्तविक हालसाविक हुइल लालपुर्जा उपलब्ध कराइ पर्ना माग राखल बा ।
भुमि सुधार कार्यालयसे २१ फागुन २०६३ मे ६५ घरधुरीहे ५ कठ्ठाके दरसे जग्गा वितरण करल रहे । उ मध्ये ५२ घरधुरीहे लालपुर्जा सहित ओ बाँकी १३ घरधुरीके कमैया परिचयपत्र बन्ना प्रक्रियामे रहल ओरसे जग्गाके लालपुर्जा नैडेके कागजके चुट्कामे लिखके जग्गाके कित्ताकाट कैके वितरण करल रहे ।
नेपाल सरकारसे २०६४ मे बसोबास कराइल मुक्त कमैया बस्तीमे अब्बे ७२ घर परिवार बैठ्टी आइल बाटै ।
मागपत्र बुझुइया टोलीमे वडा नम्बर ७ के पूर्व अध्यक्ष कमलप्रसाद चौधरी, शिविरके भलमन्सा हिंगुराम चौधरी, विपतपुरबासी, याक नेपालके विनोद सिंह, प्रदीप चौधरी लगायतके सहभागिता रहल रहे ।
