एक वर्षमे ३९५ जानेक नाकासे उद्धार

पहुरा समाचारदाता
धनगढी, १९ सावन । मानव बेचविखन क्षेत्रमे काम करटी आइल शान्ति पुनस्र्थापना गृहसे एक वर्षमे ३९५ जाने बालबालिका, लउण्डी तथा महिलाके नाकासे उद्धार करले बा ।

कैलाली ओ कञ्चनपुरसंग जोरल त्रिनगरनाका ओ कैलालीके खक्रौला नाकासे आर्थिक वर्ष २०७८÷७९ ममे तीन सय ९५ जानेक उद्धार करल बिफेक रोज आयोजित पत्रकार सम्मेलनमे जानकारी डेहल हो । भारत जैना क्रममे नाकासे कैलालीलगायत ७७ जिल्लाके महिला, लउण्डी ओ बालिकाहुकनहे बेचविखन हुइनासे सुरक्षित रख्न उद्धार करल गृहके जिल्ला संयोजक निर्मला शाही जानकारी डेली । धनगढी ओ टीकापुरहे केन्द्रमे धारके काम करटी आइल उ गृहसे सबसे ढेर कैलालीके लउण्डी, बालिका तथा महिलाहुकनके नाकासे उद्धार करल तथ्यांकमे उल्लेख बा ।

गृहसे कैलालीके एक सय ९४, कञ्चनपुरके ३७, अछामके ११, डोटीके २०, बझाङके २२, बाजुराके सात, डडेल्धुराके ११, बैतडीके आठ जानेक दुई नाकासे उद्धार करल जनैले बा । जिल्ला संयोजक शाही सुदूरपश्चिम प्रदेशबाहेक देशभरके ७७ जिल्लाके लउण्डी, महिला तथा बालिकाहुकनहे बेचविखन कैना उद्देश्यसे दुई नाका हुके भारत लैजैना प्रयास हुइना करल बटैली । विशेषतः १३ स्थानीय तह रहल कैलालीके लम्की चुहा, भजनी नगरपालिका ओ मोहन्याल गाउ“पालिकाके ढेर महिला, बालिका तथा लउण्डी ढेर प्रभावित हुइना करल उहाँ बटैली ।

गृहके अनुसार प्रलोभनमे पारके १८ से २५ उमेर समूहके लउण्डीहुकनहे बेचविखनके लाग भारत लैजैना करल बटै । गृहके तथ्यांक अनुसार आर्थिक वर्ष २०७८÷७९ मे उद्धार करल मन्से ५२ प्रतिशत लउण्डी १८ से २५ वर्ष उमेर समूहके रहल बटै ।
ओस्टेक, १६ से १७ वर्ष उमेर समूहके २२ प्रतिशत, ११ से १५ वर्ष उमेर समूहके नौ प्रतिशत, २६ से ३० उमेर समूहके नौ प्रतिशत, ३० वर्ष उप्परके चार प्रतिशत ओ १० वर्ष टरेक चार प्रतिशत रहल बटै ।

गृहसे आर्थिक वर्ष २०७८÷७९ मे भारतसे एक जानेक उद्धार करके घरपरिवारमे पुर्नमिलन करैले बा । जिल्ला संयोजक शाही महिला बेचविखन तथा जबरजस्ती करणीमे १३ जानेक विरुद्ध मुद्दा दायर करल ओ दुई सय ९७ जनहनहे परिवारके जिम्मा लगाइल बटैली ।

संस्थासे पीडितके उजुरीके आधारमे जबरजस्ती करणीविरुद्ध आठ, जबरजस्ती करणीसंगे मानव बेचविखन तथा ओसारपसारमे चार ओ मानव बेचविखन तथा ओसारपसारमे एक करके १३ मुद्दा दर्ता कराइल तथ्यांकमे उल्लेख रहल बा ।