‘सोच परिवर्तनसे केल लैङिक जन्मदर सन्तुलन’
पहुरा समाचारदाता
धनगढी,१९ सावन । धनगढी उपमहानगरपालिकाके नगर उपप्रमुख कन्दकला राना सोच परिवर्तनसे केल लैङिक जन्मदर सन्तुलन हुइना बटैले बटी ।
विफेक रोज धनगढीमे स्वास्थ्य तथा जनसंख्या मन्त्रालयके आयोजनामे कृपा ओ युएनएफपीएके सहकार्यमे हुइल विभेदपूर्ण लिङ छनौटके अन्त्यके लाग राष्ट्रिय रणनीति(२०७८–२०८८) बारे छलफल कार्यक्रमके वडका पहुना रहल नगर उपप्रमुख राना उ बाट बटवाइल रहिट ।
यहाँ विभेद बा, हानिकारक प्रथा कायम बा,’ नगर उपप्रमुख राना कहली, ‘सोचमे परिवर्तन नइआइटसम लैङिक जन्मदर सन्तुलन नइहुई । प्रदेशमे छाउपडी प्रथा लगायत रुढीबादी परम्परा बा, छावा हुई परल कना सोच बा । जिहीसे भ्रुण जाँच कैके बच्चा जन्माइल डेखल बा ।’ विभेदपूर्ण लिङ छनौटके अन्त्यके लाग राष्ट्रिय रणनीति(२०७८–२०८८) बारे पालिकाके छलफल करटी अपन कर्तव्य अनुसार आघे बह्रनाफे उहाँ प्रतिबद्धता जनैली ।
सामाजिक विकास मन्त्रालयके सचिव दिपक लामिछाने लैङिक जन्मदर सन्तुलन बनाइक लाग सामाजिक परिवर्तन आवश्यक रहल बटैलै । विगतके तुलनामे छाईनहे हेर्ना दुष्टिकोणमे परिवर्तनमे अइटी रहल मने अभिन कुछ समय लग्ना उहाँ बटैलै ।
युएनएफपीएके प्रदेश संयोजक गणेश शाही लैङिक समानताके लाग आर्थिक शसक्तकीकरणमे जोड डेहल रहिट । कार्यक्रममे इन्सेक प्रदेश संयोजक खडकराज जोशी अन्धविस्वास ओ कुरिटी हटैना जरुरी रहल बटैलै । नेपाल पत्रकार महासंघ कैलाली अध्यक्ष हिमालय जोशी भ्रुण पहिचानके लाग नेपालीहुक्रे भारतके पलियामे जैटी रहल बटैलै । फियन नेपालके प्रदेश संयोजक मुकुन्द राना जनचेनताके कमीसे लैङिक हिंसामे कमी नइआइसेकल बटैलै ।
कार्यक्रममे परिवार नियोजन कार्यालयके प्रमुख चेतराज फुलारा, पत्रकार अर्जुन शाह, गैसस प्रदेश सचिव लोकमान धामी, सेती प्रादेशिक अस्पतालके यशोदा ढकाल, सामाजिक विकास मन्त्रालय महिला तथा बालबालिका शाखाके जयन्ती गिरी, इन्सेक प्रदेश कार्यालयके प्रलेख अधिकृत कृष्ण विक लगागत सामाजिक कुरिटी ओ हानिकारक अभ्यासमे अल्झल ओरसे समाजमे लैङिक विभेद हुइल बटैले रहिट ।
कार्यक्रममे कृपाके कार्यकारी निर्देशक आनन्द तामाङ रणनिति कार्यान्वयनके लाग अनुमानित लागतबारे जानकारी डेहल रहिट । ओकर उहाँ ४ अर्ब ६० करोड ७४ लाख १६ हजार ३९७ रुप्या लग्ना बटैले रहिट । कार्यक्रममे अंचला श्रेष्ठ, वरिष्ठ स्वास्थ्य नर्स सोनालक्ष्मी कर्माचार्य, जेसी लिलामणि पोख्रेल, मन्त्रालयके रोशनीदेवी कार्की लगायत विभेदपूर्ण लिङ छनौटके अन्त्यके लाग राष्ट्रिय रणनीति(२०७८–२०८८) बारे जानकारी डेहल रहिट ।
कार्यक्रम स्वास्थ्य तथा जनसंख्या मन्त्रालयके सचिव देवकुमारी गुरागाई अध्यक्षतामे हुइल रहे । संचालन उपसचिव रोशनीदेवी कार्की करले रहिट ।
