बाढसे खुटियाके पुल जोखिममे
पहुरा समाचारदाता
धनगढी, १९ सावन । लगातार पानी परलपाछे आइल बाढके कारण खुटिया लडियाके पुल जोखिममे परल बा । बाढसे पुल सुरक्षित राखक लाग बनाइल कटपवालसमेत भटक्के पुल जोखिममे परल हो ।
पुलके दक्षिणओर करिब १०० मिटर कटप बाढसे पुहाइबर पुल नै जोखिममे परल स्थानीय बटैले बाटै । इहीसे आघे कटपवाल ४० मिटर किल पुहाइबर सडक डिभिजन कार्यालयहे जानकारी कराइल रहे ।
सडक डिभिजन कार्यालय महेन्द्रनगरके प्रमुख हरि सुवेदी उ बेला अपनेहुक्रे भर्खरर आइल बटैटी उ बारे बुझ्ना बटैलै । कटपवाल तत्काल मर्मतके लाग जनशक्ति परिचालनसमेत कैना उहाँ बटैलै ।
मने, समयमे मर्मत नैकैके थप ६० मिटर कटपवाल पुहैनाके साथे लडिया नियन्त्रणके लाग लगाइल ढुंगाके जाली समेत पुहैना स्थितिमे पुगल स्थानीय बासिन्दा करण बोगटी बटैलै ।
स्थानीय बोगटी कटप वाल असुरक्षित बन्टी गैल ओ बाढ अइलेसे कौनो फेन बेला भत्काइ सेक्ना कहटी सडक डिभिजन कार्यालयहे जानकारी कराइल बटैलै । उहाँ जानकारी कराइमे फेन वास्ता नैकरल कारण कटप वाल भत्कल गुनासो करलै ।
सडक डिभिजन कार्यालय महेन्द्रनगरके प्रमुख सुवेदी बर्षातके समय हुइल ओ ओकर लाग बजेट समेत रहल बटैटी बर्षातपाछे मर्मत कैना बटैलै ।
