बाघक छालासहित ४ पक्राउ
पहुरा समाचारदाता
धनगढी, २० सावन । बाघक छाला सहित ४ जनहनहे प्रहरी पक्राउ करले बा । बिफेक रोज कैलालीके गोदावरी नगरपालिका–२ अत्तरिया ओर अवैध बाघक छाला ओसार पसार हुइटी रहल सूचनाके आधारमे आरआईटी ओ इलाका प्रहरी कार्यालय माला खेतीसे खटल संयुक्त प्रहरी टोली उहाँहुक्रनहे गोदावरीसे पक्राउ करल हो ।
पक्राउ परुइयामे डोटी जोरायल गाउँपालिका २ बैठुइया समिर ओली, चुरे गाउँपालिका ६ के टेक बहादुर रावत, उहे ठाउँके धिरेन्द्र रावत ओ बैतडी डिलासैनी गाउँपालिका २ बैठुइया राजेन्द्र सिंह भण्डारी रहल जिल्ला प्रहरी कार्यलय कैलाली जनैले बा । ओइनठनसे कपारसे पुँछीसमके ४ फिट ७ ईन्च, पुँछीक लम्बाइ ३ फिट २ ईन्च चौडाइ २ फिट २ ईन्च रहल बाघक छाला, प्लास्टिकके कट्ठा, हण्डी २ केजी बरामत करल प्रहरी जनैले बा ।
गोदावरी नगरपालिका २ तेघरी खानेपानी टयांकी लग्गे सडकमे पुगेबर बुडरसे धनगढी ओर आइल सुपप्र ०४–००१ च ०००६ बोलेरो जिपहे नियन्त्रणमे लेके बाघक छाला हड्डी सहित ओइनहे पक्राउ करल हो ।
फाइल फाेटु
