देहरिया वन क्षेत्र फोहोरसे दुर्गन्धित
पहुरा समाचारदाता
धनगढी, २२ सावन । वन आसपासके क्षेत्र हराभरा, स्वच्छ वातावरण रहल मानजाइठ् । मने, धनगढी उपमहानगरपालिका–७ देवहरिया सामुदायिक वन क्षेत्र भर ओकर विपरित दुगन्धित बनल बा ।
वन क्षेत्रमे जथाभावी फोहोर फेक्ना करल कारण वन क्षेत्र दुर्गन्धित बनल हो । स्वच्छ हावामे रमाउँ कहिके उ वन क्षेत्र आसपासमे गैल उल्टे नाक टुमके भागे पर्ना अवस्था सृजना हुइल बा । ‘स्वच्छ हावा लिउँ कहिके जाइबर दुर्गन्धसे उल्टी अइना करठ्’, देवहरियावासीसमेत रहल पत्रकार लखन चौधरी कहलै । ‘लागठ्, सहरभरिक फोहोर यहोरे लानके फेँकजाइठ् ।’
मासु पसल, सैलुनसे निकरल फोहोर, दारुके भट्टीके बोत्तल, मेडिकल पसलसे निकरल फोहोर सक्कु वन क्षेत्रमे लानके फेन्ना करल चौधरी उल्लेख करले बाटै ।‘बनुवामे बेवारिसे गौशालामे आहार नैपाके मरल चौपायाके दुर्गन्ध ओस्टे बा’, उहाँ कहले बाटै ।
देवहरिया वन छेउछाउमे गरिब मजदुर, किसान बैठ्ना करल ओ घरसे निकरना फोहोर उहाँहुक्रे अपनहे व्यवस्थापन कैना करल बटाइल बा । वन क्षेत्रमे सहरियाहुक्रे जाके फोहोर फेँक्ना करल चौधरी जिकिर करलै । उहाँ अभियन्ताहुक्रनके सरसफाइ बजार क्षेत्रमे किल सीमित रहल गुनासो करले बाटै ।
