राज्यमन्त्री रैकासे एकीकृत सामाजिक सूचना व्यवस्थापन प्रणालीके उद्घाटन

पहुरा समाचारदाता
धनगढी, २२ सावन । संघीय महिला, बालबालिका तथा जेष्ठ नागरिक मन्त्रालयके अगुवाइमे अँट्वारके रोजसे धनगढीमे एकीकृत सामाजिक सूचना व्यवस्थापन प्रणालीके उद्घाटन हुइल बा ।

विनरक इन्टरनेशनल एवं निड्स नेपालके प्राविधिक सहयोग तथा यूएसएआइडी, यूकेएइडके ‘हाम्रो सम्मान’ परियोजना अन्तर्गत सुरु हुइल प्रणालीके सुदूरपश्चिम प्रदेशके सामाजिक विकास राज्यमन्त्री टेकबहादुर रैका एक कार्यक्रमके बीच उद्घाटन करले रहैं ।

कार्यक्रममे राज्यमन्त्री रैका समाजमे हुइटिरहल अपराधिक घटनाके गलत सूचनासे निर्दाेषहुक्रे सजाइ भोगे परल ओरसे असिन प्रणाली आवश्यक रहल बटैलैं । उहाँ कलैं, “गलत सूचनाके कारण निर्दाेष मनै सजाय भोगटैं । टबेमारे आधिकारिक नियकासे सूचना जारी करेपरठ ।” “सूचनाके हकमे तथ्यांक ढरना जरुरी रहठ,” उहाँ कलैं, “दक्ष जनशक्ति ढैके अइसिन सूचना प्रभावकारी बनाइ परठ ।” एकीकृत सामाजिक सुचना व्यवस्थापन प्रणालीहे प्रदेश सरकारसे सहयोग रहल उहाँ बटैलैं ।

कार्यक्रममे महिला, बालबालिका तथा जेष्ठ नागरिक मन्त्रालयके उपसचिव भरतराज शर्मा यी प्रणालीमे स्थानीय तहमे हुइना घटनाके अभिलेखीकरण हुइना बटैलैं । उहाँ मानव बेचबिखन, महिला हिंसा, लैंगिक हिंसा, वैदेशिक रोजगारके समस्या, श्रमशोषणलगायत अपराधिक घटनाहे स्थानीय तहसे अभिलेखीकरण कैके अइसिन घटना नियन्त्रण करे सेक्ना बटैलैं । उहाँ कलैं, “अइसिन अपराधके घटनाहे विशिष्टिकृत कैके सेवा प्रवाहके लाग यी प्रणाली सुरुवात करल हो ।”

कार्यक्रममे निड्स नेपालके सहकार्यकारी निर्देशक प्रकाशचन्द्र मडै सुरुवातमे कैलालीके पाँच ओ कञ्चनपुरके चार ठो स्थानीय तहमे लागू हुइल बटैलैं । उहाँक अनुसार कैलालीके धनगढी उपमहानगरपालिका, टीकापुर नगरपालिका, घोडाघोडी नगरपालिका, गोदावारी नगरपालिका, जोशीपुर गाउँपालिका ओ कञ्चनपुरके भीमदत्त नगरपालिका, बेलौरी नगरपालिका, पुनर्वास नगरपालिका, बेलडाँडी गाउँपालिकामे एकीकृत सामाजिक सूचना व्यवस्थापन प्रणाली सुरु हुइल हो । यी परियोजना कुछ दिनमे सुदूरपश्चिम प्रदेशलगायत औरे प्रदेशके अन्य स्थानीय तहमे फेन लागू हुइना उहाँ जानकारी करैलैं ।

कार्यक्रममे परियोजनाके रत्नकाजी श्रेष्ठ कानून ओ सरकारी शासनके व्यवस्थापन करे परना रहल ओरसे यी प्रणाली आवश्यक रहल बटैलैं ।

कार्यक्रममे राष्ट्रिय मानव अधिकार आयोगके सुदूरपश्चिम कार्यालय प्रमुख मोहनदेव जोशी, याक नेपालके देवीप्रसाद खनाल, नवराज उपाध्यायलगायत मन्तव्य व्यक्त करले रहैं । अभिमुखी कार्यक्रममे प्रत्येक स्थानीय तहके महिला, बालबालिका तथा जेष्ठ नागरिक शाखाके १ ओ सूचना प्रविधि शाखाके १ कैके २/२ जहनके सहभागीता रहल रहे ।

कार्यक्रम निड्स नेपालके कार्यक्रम निर्देशक भवराज रेग्मीके अध्यक्षतामे हुइल रहे ।