जनताके रुचाइल उम्मेदवार बनैना सुझाव

पहुरा समाचारदाता
धनगढी, २४ सावन । नेपाली काँग्रेसके नेताकार्यकर्ताहुक्रे आसन्न संघीय तथा प्रदेश निर्वाचनमे उम्मेदवार तय कैना कार्यशैलीमे सुधार कैना नेतृत्वसंग आग्रह करले बटै ।

का“ग्रेस कैलालीके नेता कार्यकर्ताहुक्रे नेताके पहुँचमे रहल व्यक्तिहे जिल्ला तथा स्थानीय तहमे प्रभाव नइहेरके उम्मेदवार बनाइबेर पार्टीसे क्षति व्यहोरल बटैले बटै । नेपाली काँग्रेस कैलालीसे मंगरके पार्टीके केन्द्रीय सदस्य, प्रदेश समिति सदस्य, जिल्ला समितिके पदाधिकारी, भातृ संघसंगठनके प्रतिनिधिहुकनके सहभागितामे आयोजना करल छलफल कार्यक्रममे बोल्न अधिकाँस नेता तथा कार्यकर्ताहुक्रे उम्मेदवार चयन करेबेर अपनसेफे जनतासे रुचाइल व्यक्तिहे उम्मेदवार बनैना सुझाव डेलै ।

अब्बे नेपाली काँग्रेस केल नइहुके और भारी दलहे कैलालीके निर्वाचन क्षेत्र नम्बर १, २ ओ ३ मे अपन उम्मेदवारहे विजयी करैना चुनौति थपल कहल बा ।

स्थानीय तहके निर्वाचनमे कैलालीके चार स्थानीय तहमे नागरिक उन्मुक्ति पार्टीके उम्मेदवार निर्वाचित हुइल कारण और दलहे चुनौति बनल हो । कैलाली निर्वाचन क्षेत्र नम्बर १ रेश्म चौधरीके पकड क्षेत्र हो, निर्वाचन क्षेत्र नम्बर ३ थारु समुदायके बाहुल्य रहल क्षेत्र हो कलेसे निर्वाचन क्षेत्र नम्बर २ मे फे और दल पराजय भोगे पर्ना आशय व्यक्त करटी रहल बटै ।

२०७९ के स्थानीय तहके निर्वाचनमे प्रचार–प्रसारमे नेतृ देउवा धनगढी उपमहानगरपालिकाके १९ वडामे खटल रहिट । धनगढी पुगल नेतृ देउवा कैलाली निर्वाचन क्षेत्र नम्बर ५ से अपने उम्मेदवार हुइना पत्रकार सम्मेलनमार्फत जानकारी करैले रहिट ।

काँग्रेस कैलालीसे वडा तहसम्म भेला कैना

नेपाली काँग्रेस कैलालीसे अइना निर्वाचनहे लक्षित करके वडा तहसम रणनीतिक भेला कैना निर्णय करले बा ।

मंगरके बैठल जिल्ला कार्यसमितिके रणनीतिक भेलासे अइना अगहन ४ गते हुइना प्रदेश ओ प्रतिनिधि सभाके निर्वाचनमे पार्टीके उम्मेदवारहे विजयी करैना वडा तहसम रणनीतिक भेला कैना निर्णय करल हो । निर्वाचनहे लक्षित करके केन्द्रिय सदस्य, महासमिति सदस्य, महाधिवेशन प्रतिनिधी, जिल्ला कार्य समितिके पदाधिकारी, प्रदेश निर्वाचन क्षेत्रके पदाधिकारी, नगर पदाधिकारी, वडा प्रतिनिधीसंगे भातृ संघ संगठनके पदाधिकारीहे वडा तहसम प्रतिनिधीके रुपमे खटाके रणनीतिक भेला कैना निर्णय करल जिल्ला सचिव केशव मिश्र बटैलै ।

बैठकसे सामाजिक संजालमे पार्टीके नेताविरुद्ध टिकाटिप्पणी तथा आलोचना कैना कार्यकर्ताके निगरानी कैना पार्टी सभापति नारायणदत्त भट्ट एक समिति गठन कैना निर्णय हुइल बटैलै । ओस्टेक, जिल्लामे पूर्णता नइपाइल भातृ तथा शुभेच्छुक संघ संस्थाहे पूर्णता डेके सक्रिय बनैना जनाइल बा । बैठकमे नेपाली काँग्रेसके केन्द्रिय सदस्य सुशिला मिश्र भट्ट, जीवन राना, स्थानीय तहमे नेपाली काग्रेंससे निर्वाचित जनप्रतिनिधि लगायत टमान भातृ तथा शुभेच्छुक संस्थाके प्रमुखहुकनके सहभागीता रहे