‘कोरोना खोपसे बञ्चित सक्कुहन खोप लगाउ’

कैलालीमे कोरोनाके पहिल खोप ९३ प्रतिशत ओ बुष्टर ३६ प्रतिशत केल लगैलै
पहुरा समाचारदाता
धनगढी, २७ सावन । सुदूरपश्चिम प्रदेशके सामाजिक विकास राज्यमन्त्री टेकबहादुर रैका कोरोना खोपसे बञ्चित सक्कु जनहनके खोप लगैना आग्रह करले बटै ।

स्वास्थ्य कार्यालय कैलालीके आयोजना तथा फाया नेपाल ओ वेस कैलालीके सहकार्यमे विफेक रोज धनगढीमे हुइल कोभिड–१९ विरुद्धके खोप कभरेज बह्राइक लाग सरोकारवालासंग कैगिल अन्तरक्रिया कार्यक्रममे उहाँ कोरोना भाइरससे बँचाइक लाग खोपसे बन्चित सक्कु जनहनहे खोप लगैना आग्रह करल रहिट । कोरोना संक्रमण फेरसे बहै्र लागल बा,’ राज्यमन्त्री रैका कहलै,‘जे–जे कोरोना खोप लगैनासे बञ्चित बटै, ओइनहे हाली खोप लगाउ । प्रदेश सरकारसे का सहयोग करे परी, हम्रे तयार बटी ।
तीन चरणके खोप उपलब्ध हुसेकल‘कोरोना खोपसे बञ्चित सक्कुहन खोप लगाउ’ मने सबसे कम बुष्टर डोज लगाइल बा, सरोकारवाला निकाय यम्ने ध्यान डेहे पर्ना राज्यमन्त्री रैका कहलै ।

सहायक प्रमुख जिल्ला अधिकारी यज्ञराज जोशी कैलाली जिल्ला खुला सिमाना रहल कारण्ण ढेर जोखिममे परल बटैलै । उहाँ कहलै, ‘अब्बे सिमानाकासे लौटलहे ढेर संक्रमण डेखा परटी रहल ओरसे चेकजाँच कडा बनाई पर्ना बटैलै ।
जिल्ला समन्वय समितिके सभापति पदम कलेल कोरोना खोपसे बञ्चित क्षेत्रमे सचेतना अभियानसहित खोप कार्यक्रम कैना जरुरी रहल बटैलै ।

सामाजिक विकास मन्त्रालय स्वास्थ्य महाशाखाके जनस्वास्थ्य अधिकृत दयाकृष्ण पन्त कैलालीमे पहिल ओ दुसर चरणके खोप सन्तोषजनक रहल मने बुष्टर खोपके अवस्था चिन्ताजनक रहल बटैलै । ९० प्रतिशत खोप पुरा करलेसे राष्ट्रिय लक्ष्यमे पुग्ना उहाँ बटैलै ।

स्वास्थ्य निर्देशनालयके निर्देशक डा. जगदीश जोशी ढेर जैसिन व्यक्ति जनजन्ती खोप नइलगाइल बटैलै । उहाँ कहलै, ‘खोप निशुल्क, बा, अनिवार्य ओ कोरोनासे बचाई लाग जरुरी बा ।’
स्वास्थ्य कार्यालयके प्रमुख लालबहादुर धामी अइना चुनावसम पाँच बरस उप्परके सक्कुहुनहे खोप लगासेक्ना बटैलै । उहाँ कहलै, ‘कोभिड सचेतनाके लाग सक्कु विद्यालयहे परिचालन करब । जेम्ने विद्यार्थीहुक्रे अपन गाउँघरमे सूचना संप्रेशन करही, के–के कोरोना खोपसे बञ्चित बटै टे ?’ ओस्टेक करके लम्की क्षेत्रमे अब्बे डेंगुके प्रकोप फैलल ओरसे सक्कु जाने सचेतता अपनाडेना उहाँ आग्रह करलै ।

कार्यक्रममे वेस कैलालीसे जिल्ला संयोजक लक्ष्मण चौधरी ओ फाया नेपालसे सचितानन्द जोशी कोभिड–१९ विरुद्धके खोपके लाग समुदाय परिचालन परियोजना करल गतिविधिबारे जानकारी डेहल रहिट ।

कौन पालिकामे कटरा लगैलै कोरोना खोप

कैलाली जिल्लामे कोरोना भाइरस विरुद्धके पहिल खोप ९३ प्रतिशत, दुसर खोप ७९ ओ टिसरा खोप ३६ प्रतिशत केल लगैले बटै । स्वास्थ्य कार्यालयसे डेहल जानकारी अनुसार कैलालीके १३ पालिका मन्से मोहन्याल गाउँपालिकामे पहिल खोप सबसे कम ६५ प्रतिशत केल लगैले बटै । यहाँ दुसर खोपफे ५३ प्रतिशत ओ टिसरा खोप ४० प्रतिशत लगाइल बा । चुरे गाउँपालिकामे पहिल खोप ८३ प्रतिशत, दुसर खोप ६४ प्रतिशत बुष्टर खोृप २९ प्रतिशत लगाइल बा । गोदावरी नगरपालिकामे पहिल खोप १०३ प्रतिशत, दुसरा खोप ९१ ओ बुष्टर दोप ३१ प्रतिशत लगाइल बा ।

गौरीगंगा नगरपालिकामे पहिल खोप ८७ प्रतिशत, दुसरा ७१ ओ बुष्टर खोप ३३ प्रतिशत लगाइल बा । घोडाघोडी नगरपालिकामे पहिल खोप ८८ प्रतिशत, दुसरा ७४ ओ बुष्टर खोप ३५ प्रतिशतमे लगाइल बा । बर्दगोरिया गाउँपालिकामे पहिल खोप ८८ प्रतिशत, दुसर खोप ७४ ओ बुष्टर खोप ३३ प्रतिशतमे लगाइल बा ।

लम्की चुहा नगरपालिकामे पहिल खोप ८९ प्रतिशत, दुसरा खोप ७८ ओ बुष्टर खोप ३७ प्रतिशतमे लगाइल बा । जानकी गाउँपालिकामे पहिल खोप ८० प्रतिशत, दुसरा ६८ ओ बुष्टर खोप ३४ प्रतिशतमे लगाइल बा । जोशीपुर गाउँपालिकामे पहिल खोप ८१ प्रतिशत, दुसरा खोप ७० ओ बुष्टर ३८ प्रतिशतमे लगाइल बा । ओस्टेक टिकापुरमे पहिल खोप १०५ प्रतिशतमे दुसरा ८६ ओ बुष्टर खोप ३८ प्रतिशतमे लगाइल बा ।

भजनी नगरपालिकामे पहिल खोप ८१ प्रतिशतमे, दुसर ६६ ओ बुष्टर खोप ३२ प्रतिशतमे केल लगाइल बा । कैलारी गाउँपालिकामे पहिल खोप ८३ प्रतिशतमे, दुसरा ७४ ओ बुष्टर खोप ४३ प्रतिशतमे लगाइल कन कलेसे धनगढी उपमहानगरपालिकामे ११२ प्रतिशत, दुसरा ९७ ओ बुष्टर खोप ३९ प्रतिशतमे लगाइल बा ।