११ बरससम नैबनल कान्द्रा पुल

पुल अलपत्र छोरके भग्लै ठेकदार

पहुरा समाचारदाता
धनगढी, ०२ भदौ । हुलाकी राजमार्गके थेकीपुरमे ११ बरस आघे पुल निर्माण करलेसे फेन आभिन पूरा हुइ सेकल नैहो । भजनी नगरपालिका–३ के थेकीपुरमे २०६८ सालमे पुल निर्माण सुरु हुइल रहे । पुल निर्माण कैना कम्पनीके ठेकदार भागल पाछे पुल निर्माण अलपत्र परल हो ।

समयमे पुल निर्माण नैहोके सबसे ढिउर मार भजनी नगरपालिकाके वडा नम्बर ५, ७ ओ ९ मे बसोबास करुइया स्थानीय ओ विद्यार्थीहे समस्या हुइना करल बा । उ वडामे बसोबास करुइयाहुक्रे ज्याला मजदुरीसे औषधिमुलो ओ शैक्षिक गन्तव्य हो भजनी बजार । जहाँ अइना जैना डुंगाके प्रयोग अनिवार्य रहल बा ।

डुंगासे ओहोरदोहर करेबर कौन बेला का हुइ कना चिन्ता रहल भजनी नगरपालिका ७ के सुन्दर चौधरी बटैलै । उहाँ दैनिक ज्यालादारीके लाग हरेक दिन कान्द्रा लडिया डुंगा मार्फत नघ्ना बाध्य बाटै ।

‘पुल इ बरस निर्माण सम्पन्न हुइना सुनल रहुँ, मने पुल अलपत्र छोरक ठेकेदार भागल सुन्ठु ।’ उहाँ प्रश्न करटी कहलै– ‘हमार पुल नाघके वारपार कैना सपना कहिया पूरा हुइ, नेपालमे समयमे काम नैकरुइया ठेकेदारहे कारवाही कैना कौनो निकाय बा कि नैहो ?’ पानी परल बेला डुंगा समेत नै चलके लडिया किनारमे बैठके घर घुम्नाके विकल्प नैहो ।

यहोर समयमे पुल निर्माण तथा हुलाकी राजमार्ग अन्तर्गत भजनी नयाँ सहर विकास कार्यक्रम अन्तर्गत चक्रपथ रिङरोड योजना लगायतके माग सहित भजनी नगरपालिकाके मेयर केवल चौधरीके टोलीसे कुछ दिन आघे किल शहरी विकास मन्त्री मेटमणि चौधरीहे ज्ञापन पत्र बुझाइल रहे । ज्ञापनपत्र बुझैटी किल पुलके ठेकदार फोन मार्फत अगामी पुस माघ मसान्त भित्रे पुल निर्माण कार्य सम्पन्न कैना प्रतिवद्धता जनाइल मेयर चौधरी बटैलै ।

चार करोड ४३ लाख रुपियाँमे साल्पारशेर्पा–लामा–बिरुवा संयुक्त रूपमे उ पुल निर्माणके ठेक्का पाइल रहे । ३० महिना समयावधि रहल उ पुलके म्याद घरी–घरी थप कैलेसे फेन नैबनलपाछे हुलाकी राजमार्ग आयोजनासे ठेकेदारसँग ठेक्का टुर्ना तयारी करले बा । हुलाकी राजमार्ग आयोजनाके इन्जिनियर पदम मडैके अनुसार आब पुरान ठेक्का टुरके लावा ठेक्का कैके पुलके बाँकी काम सम्पन्न करजाइ । दशक लम्मा समय हुइलेसे फेन पुल निर्माण कार्य पूरा नैहुइलपाछे स्थानीयसहित जनप्रतिनिधिमे फेन नैराश्यता छाइल बा । कान्द्रा लडियामे पुल नैहोके स्थानीय ढिउर दुःख पाइल भजनी नगरपालिका–३ के अध्यक्ष विक्रम चौधरी बटैलै ।

२०६८ जेठमे ठेक्का हुइल पुलके पहिल निर्माण अवधि ३० महिना रहल रहे । मने, डिजाइन परिवर्तन करे पर्र्ना कारणसे साढे चार बरससम काम नैहुइल । २०७२ पुसमे डिजाइन परिवर्तन हुइलपाछे काम सुरु करल रहे । साढे दुई बरस पहिल म्याद २०७५ असारमे ओराइल रहे । चौथाचो थप हुइल म्याद चैत मसान्तमे ओराइल रहे ।