कैलाली–५ मे नागरिक उन्मुक्तीसे लक्ष्मण थारुके दावी
पहुरा समाचारदाता
धनगढी, २ भदौ । कैलाली जिल्ला क्षेत्र नम्बर पाँचमे प्रतिनिधिसभा चुनावके लाग नागरिक उन्मुक्ती पार्टीसे लक्ष्मण थारु दावी करले बटै ।
यिहे अगहन ४ गते हुइना प्रदेश सभा ओ प्रतिनिधि सभा चुनावमे उहाँ नागरिक उन्मुक्ती पार्टीसे अपन दावी रहल घोषणा करले बटै । स्थानीय तहके चुनावमे कैलाली जिल्लामे पहिल पार्टी बनल नागरिक उन्मुक्ती प्रदेश ओ प्रतिनिधिसभा चुनावमे पाँचु निर्वाचन क्षेत्रमे विजयी हुइना उहाँ दावी करलै ।
कैलालीके सवालमे खास करके क्षेत्र नम्बर–५ मे लरना उम्मेदवारहे हेवीवेटके सज्ञा डेजाइठ, उहाँ कहलै, ‘सरकारमे रहलहुक्रे कब जिटल बटै । सत्ता चलाइल मनै कब जिटले बटै । ओइन ठेन साधान स्रोत बा, खर्च कैना अथाहा पैसा बा, शासन प्रशासनके दुरुपयोग कैना अधिकार बा । मने न्याय कैना अधिकार जनताके हाठमे बा ।’
हम्रे का कहठी कलेसे भोट, निर्वाचन कहलेक नागरिकके नैसर्गिक अधिकार हो । गोप्य मतदान हो । नागरिक काल्हके जैसिन सामान्य खानपिन, रिचार्जमे विक्न अवस्था नइहो नागरिक जागरुक हुसेकल बटै, टबमारे पाँच नम्बर क्षेत्रमे हम्रे जिटबी, उहाँ कहलै ।
कैलालीमे केल ७०/८० हजार हमार पार्टीके सदस्य रहल बटै रहल ओरसे । यिहे जिटना आधार रहल थारु बटैलै । उहाँ कैलाली जिल्ला केल नाही कौनो जिल्लामेफे हम्रे गठबन्धन नइकैना ओ पार्टी एक्केली चुनाव लरना बटैटी अवसिक चुनाउमे कैलालीमे पाँचु निर्वाचन क्षेत्रमे जिटना दाबी करलै । नेता थारुके आबके दावी नयाँ नइहो । उहाँ यिहीसे आघे २०७४ सालके प्रतिनिधि सभा चुनाउमे कैलाली क्षेत्र ५ से चुनाउ लरेबेर ८ हजार ८ सय मत नन्ले रहिट ।
नागरिक उन्मुक्ती पाटी स्थानीय तह निर्वाचनमे कैलाली जिल्लामे ४ पालिकाके प्रमुख सहिट ९९ सितमे विजयी हासिल करसेकल बा । कलेसे प्रदेश ओ संघके चुनाउहे लक्षित करके प्रशिक्षण तथा पार्टी प्रवेश कार्यक्रमहे तिब्रता बनैले बा । पार्टीसे कैलाली, बर्दिया, बाँके, दाङ, नवलपरासी रुपेन्देहीसे झापासम नागरिक उन्मुक्ती पार्टी एक चरणमे पुगके ओसेकल नेता थारु बटैलै ।
उहाँ कहलै, ‘यी विचमे कैलालीमे ठोरिक ढेर क्याण्डीडेट बटी, कैलालीके गाउँ गाउँमे टोल–टोलमे नागरिक उन्मुक्ती पार्टीमे थारु केल नाही दलित समुदायके व्यक्ति आबके विकल्प नागरिक उन्मुक्ती पार्टी हो कहटी प्रवेश करुइयाके लहर चलल बा । हम्रे दैनिक रुपमे गाउँगाउँमे टोलमे पुगल बटी ।’
ओस्टेक करके कैलाली क्षेत्र नम्बर पाँचमे नेपाली काँग्रेससे आरजु राण देउवाके दाबी बा कलेसे नेकपा एमालेसे फेरसे नारादमुनी रानाके चर्चा बा । नारादमुनी राना यिहीसे आघे विजयी हुइल रहिट ।
