संघीय शासनके नियमित अनुगमनमे जोड

पहुरा समाचारदाता
धनगढी, २ भदौ । राष्ट्रिय सभा, संघीयता कार्यान्वयन अध्ययन तथा अनुगमन संसदीय विशेष समितिके अध्यक्ष गणेशप्रसाद तिमिल्सिना नेपालके संघीय शासनहे सफल एवं बलगर बनाइक लाग संघीय शासनके नियमित अनुगमन हुइपरना बटैले बटैं ।

राष्ट्रिय सभा, संघीयता कार्यान्वयन अध्ययन तथा अनुगमन संसदीय विशेष समितिके आयोजनामे विफेक रोज धनगढीमे हुइल संघीय शासन प्रणाली सवलीकरण विषयक अन्तरक्रिया कार्यक्रममे अध्यक्ष तिमिल्सिना संघीयताके बारेमे आइल विरोधके समाधान खोज्के मत्थर पारे परना बटैलैं । “संघीयताके बारे आइल विरोधके समाधानके लाग सरोकारवालाहुकनसँग छलफल, बैठक, गोष्ठी, अन्तरक्रिया कैके पत्थर पारे परठ,” उहाँ कलैं, “स्थानीय तहके आवश्यकतानुसार संघ तथा प्रदेश सरकारके कार्ययोजना ओ बजेट छुटयाइलेसे गुनासो कम हुइ सेकि ।” उहाँ कौनो फेन योजना तर्जुमा करेबेर बिना स्वार्थ तयार पारे परनामे जोड डेले रहैं ।

कार्यक्रममे सुदूरपश्चिम प्रदेशके सभामुख अर्जुनबहादुर थापा नेपालमे संघीय शासन सफल हुइल जिकिर बरलैं । यहाँ कलैं, “नेपालके संघीयता कार्यान्वयनके डगरमे नेंगल बा ।” “चाहे जोन काम करेबेर कुछ ना कुछ त्रुटि हुइठ । उहाँ फेन हुइल हुइल हुइ,” उहाँ कलैं, “अइसिन कटिकिल संघीयता असफल हुइ कहे कहाँ मिलि ?” उहाँ कलैं, “संघीयता आइलबाद टमान कानून निर्माण होसेकल, दुई ठो स्थानीय निर्वाचन होसेकल, संघीय निर्वाचन फेन होसेकल । यिहे टे हो संघीयताके कार्यान्वयन ।”

ओस्टेके, कार्यक्रममे राष्ट्रिय सभा सदस्य गरिमा शाह संघीयता कार्यान्वयनमे हुइल कमिकमजोरीहे सुधार करके संघीयताहे बलगर बनाइ परना बटैले रहि । कार्यक्रममे सुदूरपश्चिम प्रदेश सभाके प्रमुख प्रतिपक्ष दलके नेता प्रकाशबहादुर शाह संविधानमे सबजे अधिकार पैलेसे फेन कार्यान्वयन हुइ नैसेकल बटैलैं । उहाँ नेपालमे कानूनके अभाव नैरहल मने कार्यान्वयन फितलो हुइल बटैलैं ।

कार्यक्रममे सुदूरपश्चिम प्रदेशके भौतिक पूर्वाधार विकासमन्त्री दीर्घ सोडारी संविधानके अनुसूचीमे उल्लेखित अधिकार प्रदेश सरकार प्रयोग करे नैपाके कमजोर डेखाइल बटैलैं । उहाँ पालिकाहे डेहल अधिकार फेन पालिका प्रयोग करे नैपाइल बटैलैं । आर्थिक मामिलामन्त्री प्रकाश रावल संघीयता बलगर बनाइक लाग संविधान कार्यान्वयनमे पहल करनामे जोड डेले रहैं ।

ओस्टेके कार्यक्रममे आन्तरिक मामिला तथा कानूनमन्त्री डा. रणबहादुर रावल संघीय शासनहे दीर्घकालीन बनाइक लाग सबके समन्वयकारी भूमिका रहल बटैलैं । उहाँ औरेक काम नैमजा ओ अपन काम मजा डेख्ना मनोविज्ञान रहल ओरसे संघीय शासन कमजोर डेखाइल बटैलैं ।

उद्योग, पर्यटन, वन तथा वातावरणमन्त्री मानबहादुर धामी संविधानके डेहल अधिकार प्रदेश ओ स्थानीय सरकारहे हस्तान्तरण करेपरना बटैलैं ।

सामाजिक विकासमन्त्री गोबिन्दबहादुर बोहरा संघीय शासन बलगर बनाइक लाग कानून बलगर हुइपरना बटैलैं । उहाँ संघीयता कलगर हुइलेसे संघ, प्रदेश ओ स्थानीय सरकार अप्नही सवल हुइना बटैलैं ।

ओस्टेके, कार्यक्रममे भूमि व्यवस्था, कृषि तथा सहकारीमन्त्री बिनिता चौधरी संघसे प्रदेशहे अधिकार हस्तान्तरण कैके संघीयता बलगर बनाइ परना बटैली । उहाँ संघीयता कर्मचारीके अभावमे फेन प्रदेश सरकार ढेर काम करे नैसेकल बटैलैं । भूमि व्यवस्था, कृषि तथा सहकार राज्यमन्त्री मानबहादुर सुनार संघ, प्रदेश ओ स्थानीय सरकार समन्वय करे परनामे जोड डेले रहैं ।

कार्यक्रममे सुदूरपश्चिम प्रदेश उपसभामुख निर्मला बडाल जोशी, विद्यायन तथा प्रदेश मामिला समिति सभापति नेपालु चौधरी, प्रदेश सभा सदस्य कुलबीर चौधरी, प्रदेश सभा सदस्य तारा लामा तामाङ, प्रदेश सभा सदस्य श्यामलाल राना, प्रदेश सभा सदस्य सुशीला बुढाथोकी, प्रदेश सभा सदस्य बलबहादुर साउँद, प्रदेश सभा सदस्य अक्कलबहादुर रावल, प्रदेश सभा सदस्य कुन्ती जोशी, प्रदेश सभा सदस्य वीरमान चौधरी, सहसचिव वसन्त अधिकारीलगायत मन्तव्य व्यक्त करले रहैं ।

संघीय मामिला तथा सामान्य प्रशासन मन्त्रालयके सहजीकरण ओ सुदूरपश्चिम प्रदेश सरकार मुख्यमन्त्री तथा मन्त्री परिषद् कार्यालयके व्यवस्थापन हुइल कार्यक्रम राष्ट्रिय सभा, संघीयता कार्यान्वयन अध्ययन तथा अनुगमन संसदीय विशेष समितिके संयोजक खिमलाल देवकोटाके अध्यक्षतामे हुइल रहे ।