राजनीतिमे महिला सहभागिताबारे छलफल
पहुरा समाचारदाता
धनगढी, २ भदौ । पार्टीसे वर्ग भूगोल मिलैना नाउँमे महिलाहुकनहे अर्थपुर्ण सहभागितासे बञ्चित करैटी रहल महिला नेताहुकनके कहाई बा ।
समावेशी कदमसे विफेक रोज धनगढीमे आयोजना करल राजनीतिमे महिला सहभागिता विषयक छलफलमे यैसिन बटाइल रहे । छलफलमे अखिल नेपाल स्वतन्त्र विद्यार्थी यूनियनके सुदूरपश्चिम प्रदेशके सचिव रक्षा वम पार्टीभिटरके पुरुष महिलाके नेतृत्वहे स्वीकार करे नइसेक्ना बटैली । उहाँ नेताहुकनहे सुरक्षित राखेक लाग वर्ग, भूगोल लगायत टमान नाउँमे महिलाहे नेतृत्वहे करटी वञ्चित करटी रहल उदाहरण डेली ।
उहाँ कहली’ ‘सुदूरपश्चिम प्रदेशमे नेपाली काँग्रेस पार्टीभिटर पुरुष जटराके क्षमतावान टमान महिला बटै, मने फे पार्टी हरेक वर्ष आरजु देउवाहे धनगढीसे टिकेट डेनाके कारण का हो ?’ उहाँ अनुसार सुदूरपश्चिम प्रदेशमे राजनीति कैना महिला नेताहे सुरक्षित करके अपने अवसरसे बञ्चित नइहुइना सुझाव डेली ।
ओस्टेक नागरिक उन्मूक्ति पार्टीके इन्दु थारु लैंगिताके सवालमे कौनोफे पार्टी संमवेदनशील नइरहल औल्यइली । उहाँ कहली ‘स्थानीय निर्वाचनमे गठबन्धनके नाउँसे माओवादी, काँग्रेससे दुनु पदमे पुरुष उठाके गैल निर्वाचनसे यी वर्ष महिलाके सहभागिता घटटी अवस्था आइल बा ।’ संविधानसे ३३ प्रतिशत महिला सहभागिता हुई पर्ना सुनिश्चित करले बा ।
२०७४ के निर्वाचनसे ४१ प्रतिशत महिला सहभागिता रहे, मने २०७९ के निर्वाचनसे ३७ प्रतिशतमे झरना दुर्भाग्य रहल नेता थारु कहली । उहाँ ठप्ली ‘अब्बे भारी दल कहुइया लैैगिकतामे समावेशी बा, न टे जात तथा वर्गमे । कैलाली जिल्लाके १३ स्थानीय पालिका मन्से ४ ठो पालिकामे दुनु पुरुष बटै । पार्टीसे महिलाहे उम्मेदवारी नइडेहठ, डेलेसेफे कमजोर क्षेत्रमे केल टिकेट डेना चलन बा ।’
ओस्टेक नेकपा माओवादी पार्टीके उर्मिला चौधरी परिवारसे सहयोग पैना महिला राजनीतिमे टिकाउ रहल मने टमानहस महिला नेता त्याग ओ बलिदानीके बाबजुट पलायन हुइल बटैली ।
संविधानसे नेतृत्व तहमे महिला सहभागिता हुई परठ कना प्रणालीके विकास हुइल मनेफे आर्थिक, सामाजिक ओ भूगोलके हिसाबसे महिला पाछे परल उहाँक तर्क रहे । उहाँक अनुसार चुनावी खर्च हेरेबेर आर्थिकरुपमे कमजोर महिला जटरा सक्षम हुइलेसेफे चुनाव लरना आट करे नइसेकल अवस्था सृर्जना हुइटी रहल बा ।
कार्यक्रममे नेकपा माओवादी, एमाले, एकिकृत समाजवादी पार्टी, नागरिक उन्मुक्ति, जसपा लगायतके नेतृत्व कैना महिला नेताहुकनके सहभागिता रहल रहे ।
