थारु दोषी नइहुइट, अन्यायमे परल बटैं

पहुरा समाचारदाता
धनगढी, ३ भदौ । नागरिक उन्मुक्ती पार्टीके केन्द्रीय सदस्य रन्जिता श्रेष्ठ चौधरी थारुहुक्रे दोषी नइरहल बल्की अन्यायमे परल बटैले बटी ।

विफेक रोज धनगढीमे नागरिक उन्मुक्ती पार्टीसे आयोजित प्रशिक्षण तथा पार्टी प्रवेश कार्यक्रममे बोल्टी उहाँ टीकापुर घटनाहे जोरटी थारुहुक्रे दोषी नइरहल बल्की अन्यायमे परल बटाइल रहिट । पहिचान ओ अधिकारके आन्दोलनके लाग हुइल राजनितिकके क्रममे भदौ ७ गते घटना घटल मने भदौ ८ गते थारुके घर, पसल, रिसोर्ट छानछानके जरागिल उहाँ बटैली ।

हम्रे थारु, पहाडी कहिके भेदभाव नइकरले हुइटी, नागरिक उन्मुक्ती पार्टीके स्थापना हुइलपाछे समावेशी पार्टीके रुपमे लैजैटी रहल बटी,’ उहाँ कहली,–‘मने राज्यसे जबफे विभेदकारीके भूमिका निर्वाह करटी बा । पहिचानके आन्दोलनके क्रममे घटना घटल । उ घटनाके कारण ढेर थारुनहे राज्यपक्षसे दमन कैगिल । अब्बेफे निर्दोष थारुन जेलबन्दी जीवन विताई परटिन । उ दिन सोचेर भदौ महिना कबु न आए कना हस लागठ ।’

उहाँ कहली, ‘हमार थेन बहुट ढेर पीडा बा, आव हम्रे नइरुइबी । जे जे हम्रहिनहे रुवाइल ओइनहे रुवैबी । २०७२ सालमे हुइल राजनितिक घटनामे निर्दोष थारुनमे राजबन्दी बनाके दुरवाई खोजल हो मने हम्रे नइडरैबी । सरकार अगहन ४ गते फेरसे आन्दोलन कैना बातावरण बनाडेले बा । ढकिया हमार पहिचान हो । न्यायप्रेमी जनसमुदाय एक बार न्याय कैना दिन आइटा ।’

पार्टीके प्रवक्ता दामोदर शर्मा पण्डित लाल आयोगके प्रतिवेदन सार्वजनिक कैना गठबन्धन सरकारके हिम्मत नइरहल बटैलै । थारु समुदायहे औरे पार्टीसे कमैया बनाइल कहटी नागरिक उन्मुक्ती पार्टीमे अइलेसे मालिक बन्ना बटैलै । यी पार्टी जातिय पार्टी नइहोके पहिचानवादी पार्टी रहल उहाँ बटैलै ।

पार्टीके संगठन विभाग प्रमुख लक्ष्मणकिशोर चौधरी टमान दलसे टीकापुर घटनाके निकास निकरटी न्यायके लाग आश करल मने कोई न्याय डेहुवाई नइसेकल बटैलै । अब्बे चुनाउके मुहमे लालीपप डेखाई खोजल मने केक्रो झुठा आश्वासनमे नइलग्ना उहाँ बटैलै ।

राष्ट्रिय दलित मुक्ती अभियानके अध्यक्ष प्रेम विसी समय अब्बे कोल्टे फेरल, समय आमुल परिवर्तन खोजल ओ ओकर नेतृत्व माननीय रेशम चौधरीसे लेहल बटैलै । उहाँ कहलै, रेशम थारु काँग्रेस, एमाले, माओवादीहे समर्थन करले छुटजैटै, मने उहाँ कुहीहे समर्थन नइकरल कारण उहाँहे अभिनसम जेलमे सराजाइटा ।

रेशम थारु मुद्दा हो, पहिचान हो,विचार हो,’ अध्यक्ष विसी कहलै, ‘उहाँ जेलमे नइरहलेसे यी पार्टीके जलम नइहुइट । उहाँ अपराधी नइहुइट । अधिकार, पहिचानके लाग आवाज उठैना लिडर हुइट ।’ उत्पीडित समुदाय रेशमके पक्षमे रहलफे उहाँ बटैलै ।

पार्टीके नेता लक्ष्मण थारु सत्तामे रहल थारु नेता शेरबहादुर देउवाके थेन अपन लाग टिकटके भिख मागे गैल आरोप लगैलै । उहाँ कहलै, ‘रेशम थारुके रिहाई नाउँमे नौटकी केल हुइल हो । अब्बे प्रदेश ओ संघके चुनाव घोषणा हुसेकल बा मने चुनाव लरना डराइटै ।’

केन्द्रीय गंगा चौधरी अगहन ४ गते विचारसे लरे पर्ना बटैलै । स्थानीयतह चुनावमे कैलाली जिल्लामे पहिल पार्टी बनलसेकल ओरसे प्रदेश ओ संघके चुनाउमे राष्ट्रिय पार्टी बनाइक लाग लागे पर्ना जरुरी रहल बटैलै ।

कार्यक्रममे नेकपा माओवादी पार्टी छोरके प्रवेश परल पार्टी प्रदेश सदस्य भोजराज ढाकाल, पार्टीके केन्द्रीय सदस्य चन्द्र चौधरी लगायत अपन बाट राखल रहिट ।

कार्यक्रम नागरिक उन्मुक्ती पार्टीसे धनगढी उपमहानगरपालिकाके नगर प्रमुखमे उठल उम्मेदवार निम चौधरीके अध्यक्षातामे हुइल रहे ओ संचालन पार्टीके यूवा नेता इन्दु चौधरी करले रहिट । उहे विच टमान पार्टी परित्याग करके ४ सय ५६ जाने नागरिक उन्मुक्ती पार्टीमे प्रवेश करल रहिट ।