आज श्रीकृष्ण जन्माष्टमी
पहुरा समाचारदाता
धनगढी, ३ भदौ । भगवान् श्रीकृष्णके जन्म हुइल उपलक्ष्यमे आज टमान कार्यक्रमके आयोजना कैके श्रीकृष्ण जन्माष्टमी पर्व मुलुकभर मनाजाइटा ।
यिहेबीच राष्ट्रपति विद्यादेवी भण्डारी श्रीकृष्ण जन्माष्टमी पर्वसे सक्कु नेपालीमे सुख, शान्ति, समृद्धि ओ सुस्वास्थ्यके कामना करले बटैं । सन्देशमे यी पर्वसे आपसी सद्भाव, करुणा ओ मैत्री भावना अभिवृद्धि करटि सभ्य ओ सुसंस्कृत समाज निर्माण करना प्रेरणा प्रदान करे कना शुभकामना व्यक्त करल बा ।
विश्वभरके हिन्दु धर्मावलम्बी भक्तियोग, ज्ञानयोग ओ कर्मयोगके प्रणेता भगवान् श्रीकृष्णके पूजा–अर्चना कैके श्रद्धा भक्तिपूर्वक श्रीकृष्ण जन्माष्टमी पर्व मनैना प्रचलन रहल स्मरण करटि शुभकामना सन्देशमे उहाँ उहिनसे सक्कु विश्वहे कर्मयोगमे लग्ना प्रेरित करल उल्लेख करले बटैं ।
उहाँ काम, क्रोध, लोभ, मोह त्याग कैके समाजमे सद्भाव कायम करना उत्प्रेरित करना गीता ज्ञानसे हम्रिहिनहे सुकर्मके लाग युगौँसे निरन्तर मार्गदर्शन करटिरहल उल्लेख करले बटैं । ओस्टेके प्रधानमन्त्री शेरबहादुर देउवा श्रीकृष्ण जन्माष्टमी पर्वके अवसरमे शुभकामना सन्देश डेटि सक्कु हिन्दु धर्मावलम्बीके लाग आराध्यदेव भगवान् श्रीकृष्णके शिक्षा ओ सन्देश समस्त मानव समुदायके लाग अत्यन्त उपयोगी ओ सारगर्भिक रहल बटैलैं ।
कृष्ण जन्माष्टमीके अवसरमे शुभकामना सन्देश डेटि उहाँ कृष्णभक्तिके महिमासे समाजमे शान्ति, अहिंसा, सहिष्णुता, सद्भाव ओ सदाचार प्रवद्र्धन हुइना उल्लेख करले बटैं ।
