भदौ ७ हे विद्रोह दिवस ओ ८ हे करिया दिनके रुपमे मनैना

पहुरा समाचारदाता
धनगढी, २ भदौ । भदौ ७ गतेहे टीकापुर विद्रोह दिवस ओ ८ गतेहे करिया दिनके रुपमे मनाजैना थरुहट/थारुवान राष्ट्रिय मोर्चा जनैले बा ।

मोर्चाके कैलाली जिल्ला संयोजक माधव थारुसे हस्ताक्षरित विज्ञप्ती अनुसार यिहे अइना भदौ ७ ओ ८ गते टमान कार्यक्रमके मनैना जनागिल बा ।

पहिचान ओ अधिकारके लाग विगतसे थारु कल्याण कारिणी सभा, थरुहट÷थारुवान राष्ट्रिय मोर्चा लगायतसे साझा आन्दोलनकारी संघ संस्थासे थरुहट/थारुवान आन्दोलनके हुईबेर वि.स २०७२ सालमे भदौ ७ गते टीकापुरमे दुखदायी घटना हुइल रहे । कलेसे भदौ ८ गते कुछ अपराधिक जत्थासे प्रहरी प्रशासनके संरक्षणमे थारुहुकनके घर, पसल, टहरामे आगजानी, तोडफोड, लुटपाटजैसिन क्रियाकलाप कैगिल रहे ।

राजनितिक आन्दोलनके क्रममे भदौ ७ गतेके घटनामे ७ प्रहरीसहिट एक बालके ज्यान गैल रहे । मोर्चासे भदौ ७ गतेसे घटनाहे हेरल मने भदौ ८ घटनामे चुकल कहले बा ।

‘समानता, न्याय, अधिकार, सदभावका लागि एवम दसता विरुद्ध’ टीकापुर थरुहट/थारुवान विद्रोहके सन्दर्भमे संयूक्त रुपमे ‘टीकापुर विद्रोह दिवस ओ भदौ ८ गतेहे करिया दिनके रुपमे मनैटी आइल ओरसे यी बरसफे टमान कार्यक्रम करके मनाई लागल मोर्चाके जिल्ला संयोजक माधव थारु बटैलै ।

थरुहट/थारुवान राष्ट्रिय मोर्चा, थारु कल्याणकारिणी सभा, थारु विद्यार्थी समाज लगायतसे पहिचान ओ अधिकारके लाग घनिभुत रुपमे लागल सक्रिय राजनीतिक दलसंग सहकार्य करके कैलालीके टीकापुर बजारमे भदौ ७ गते टीकापुर विद्रोह दिवस ओ भदौ ८ गते लम्कीचुहा नगरपालिकाके लम्की बजारमे करिया दिनके रुपमे मनैना विज्ञप्तीमार्फत जनागिल बा ।