कठरिया समाज नेपालके साधारण सभा

पहुरा समाचारदाता
पहलमानपुर, ४ भदौ । कठरिया समाज नेपालके साधारण सभा पहलमानपुरमे शनिच्चरके रोज निम्जल बा ।
कठरिया समाज नेपालके अध्यक्ष दुखिराम कठरियाके अध्यक्षता तथा कैलारी गाँउपालिका–८ के वडा अध्यक्ष तारामल कठरियाके वडका पहुनामे कार्यक्रम हुइल बा ।

कठरिया समुदायके एक ठो केल मातृ संगठनके रुपमे रहल यी संगठनके विगत कुछ वर्षसे साधारण सभा हुई नइसेकल रहे । गैल सावन १४ गते दुखिराम कठरियाके अध्यक्षतामे लौवा कार्यसमिति गठन पश्चात् साधारण सभा करल हो ।
गैल बर्षके आय व्यय पेश, विधान संशोधन, अइना दिनके कार्य योजना तयार तथा संस्थापक कार्यसमितिके पदाधिकारीहुकनहे सम्मान कैनाके साथे टमान विषयमे छलफल समेत हुइल बा ।

कार्यक्रममे कठरिया समाज नेपालके उपाध्यक्ष गीता कठरिया स्वागत मन्तब्य ओ अनिल प्रसाद कठरिया संचालन करले रहिट । कठरिया समुदायके टमान गाउँ जनसमुदायके उपस्थिति रहल रहे ।