सिद्धान्तनिष्ठ बौद्धिक व्यक्तित्व गुमैले बटिः राष्ट्रपति भण्डारी
काठमाडौं, ५ भदौ । समाजवादी चिन्तक एवं नेपाली कांग्रेसके नेता प्रदीप गिरी प्रति राष्ट्रपति विद्यादेवी भण्डारी श्रद्धाञ्जली व्यक्त करले बटैं ।
नेता गिरीके निधनके खबरसे अत्यन्त दुःखी बनाइल ओ हम्रे एक सिद्धान्तनिष्ठ बौद्धिक व्यक्तित्व गुमैले बटि उहाँ अपन सामाजिक सञ्जाल मार्फत बटैले बटैं । उहाँ शोकाकुल परिवारमे गहिरो समवेदना प्रकट करटि बटि ।
नेपाल एक सच्चा ओ असल नेता गुमाइलः प्रधानमन्त्री देउवा
उपचारके क्रममे शनिच्चरके रात निधन हुइल नेपाली कांग्रेसके नेता एवं प्रतिनिधि सभा सदस्य प्रदीप गिरीके अन्त्येष्टि आज हुइना हुइल बा ।
क्यान्सर रोगसे पीडित नेता गिरीके स्वास्थ्योपचारके क्रममे शनिच्चर रात ९ः३० बजे ७५ वर्षके उमेरमे निधन हुइल रहे । यिहेबीच प्रधानमन्त्री शेरबहादुर देउवा गिरीके निधनसँगे नेपाल एक सच्चा ओ असल नेता गुमाइल बटैले बटैं ।
उहाँ कले बटैं, नेपाली कांग्रेसके नेता एवं नेपाली राजनीतिके वैचारिक ओ समाजवादी चिन्तक मोर मित्र प्रदीप गिरिजीके निधनके खबरसे स्तब्ध हुइल बटु । उहाँके निधनसे नेपाल एक सच्चा ओ असल नेता गुमैले बा । उहाँक आत्माके चिरशान्तिके कामना करटि यी दुःखद घडीमे परिवारजनमे हार्दिक समवेदना व्यक्त करटु ।
कांग्रेस संसदीय दलके सचेतक मीनबहादुर विश्वकर्माके अनुसार उहाँक पार्थिव शरीर बिहान ९ बजेसे ११ बजेसम श्रद्धाञ्जलिके लाग ललितपुरके मेडिसिटी अस्पताल परिसरके शिवालयमे ढरजाइ ।
ओकरबाद ११ः३० बजेसे २ बजेसम कांग्रेस पार्टी कार्यालय सानेपाके बीपी स्मृति भवनमे श्रद्धाञ्जलि लाग रना जानकारी डेलैं । ओकरपाछे अन्त्येष्टिके लाग पशुपति लैजाजाइ । स्वास्थ्य जटिल बन्टि गैलओरसे उहाँ गैल साउन ८ गते अस्पताल भर्ना हुइल रहैं ।
उहाँक निधनपश्चात् कांग्रेस विज्ञप्ति प्रकाशित कैके भावपूर्ण श्रद्धाञ्जलि व्यक्त करले बा ।
नेताहुकनसे फेन समावेदना
नेता गिरीके निधनप्रति नेकपा(एमाले)के अध्यक्ष केपी शर्मा ओली श्रद्धाञ्जली व्यक्त करले बटैं । चिन्तनशील राजनीतिकर्मीके निधनसे मर्माहत हुइल उहाँ बटैले बटैं । अध्यक्ष ओली उहाँप्रति हार्दिक श्रद्धासुमन अर्पण करटि शोकाकुल परिवारजनमे गहिर समवेदना व्यक्त करले बटैं ।
नेता गिरीके निधनप्रति नेकपा (माओवादी केन्द्र) के अध्यक्ष पुष्पकमल दाहाल (प्रचण्ड) श्रद्धाञ्जली व्यक्त करले बटैं । नेपाली राजनीतिक वौद्धिक व्यक्तित्व वरिष्ठ समाजवादी चिन्तकहे गुमाइल कटि उहाँ श्रद्धाञ्जली व्यक्त करटि शोकसन्तप्त परिवारजनमे समवेदना प्रकट करले बटैं ।
ओस्टेके, नेपाली कांग्रेसके बरिष्ठ नेता डा शेखर कोइराला गिरीके निधन प्रति श्रद्धाञ्जली व्यक्त करले बटैं । नेपाली राजनीतिके जब्बर व्यक्तित्व, समाजवादी चिन्तक तथा नेपाली कांग्रेसके नेता गिरीके निधनसे स्तब्ध ओ मर्माहत बनाइल उहाँ बटैले बटैं ।
नेपालके प्रजातान्त्रिक आन्दोलन तथा पार्टी संगठनमे प्रदीप दाजुसे पुगाइल योगदानके जत्रे चर्चा करलेसे फेन अधुरे रहि कना उहाँक कहाइ बा । नेता कोइराला शोकाकुल यी समयमे समस्त परिवारमे समवेदना प्रकट करले बटैं ।
