मुक्तकमैयनहे बैठल ठाउँमे जग्गा दर्ताके माग

पहुरा समाचारदाता
काठमाडौं, ८ भदौ । छुट मुक्तकमैयाहुकन बैठल ठाउँमे जग्गा दर्ताके माग करटी टमान मन्त्रालयमे ज्ञापनपत्र बुझाइल बा ।

मंगरके रोज श्रम मन्त्रालय, कानून मन्त्रालय, शिक्षा मन्त्रालय ओ अर्थ मन्त्रालयमे मुक्तकमैयाहुकनके माग मुद्दासहितके ज्ञापनपत्र बुझाइल मुक्तकमैया महिला विकास मञ्चके अध्यक्ष कौशिला चौधरी बटैली ।

सरकार अब्बे भुमिहिनहे जग्गाके लालपुर्जा वितरण प्रक्रिया आघे बह्रैटी रहल बेला छुट मुक्त कमैयाहुकन बसोवास करटी रहल ठाउँमे परिचयपत्रके व्यवस्था सहिट बैठल ठाउँमे जग्गा दर्ता करके लालपूर्जा वितरण करे पर्ना माग करल बा ।

२०५९⁄२०६० सालमे जिल्ला भुमिसुधार कार्यालयसे प्रदान करल निस्सा प्रमाण ओ साविक गाविस, वडा कार्यालय, नगरपालिकाके सिफारिसके आधारमे छुट हुइल मुक्त कमैयाहुकनहे निस्सा प्रमाण ओ सिफारिस करल आधारमे जे जहाँ बैठल बटै स्थलगत अध्ययन करके फिल्डमे परिचयपत्र ओ जग्गाके लालपूर्जा वितरण कैना माग करल बा ।

सरकारसे सुकुम्वासीहुक्रे जोतभोग करटी रहल जमिनमे मुक्त कमैयाहुकनहे किट्टाकाट करके लालपूर्जा उपलब्ध कराइल ओरसे सुकुम्वासीहुकनके विवादसे जग्गा उपभोग करे नइपाइल परिवारहे शिघ्र सट्टा भर्ना करके पुनस्र्थापना करे पर्ना, परिचय पत्र बदर करल कैलालीके १७३ जाने मुक्त कमैयाहुकनके परिचय पत्र सदर करे पर्ना, बर्दिया जिल्लामे मुक्त कमैया छानविन समितिसे ठहर करल १०७८ घर परिवारहे मुक्त कमैयाहुकनके परिचयपत्र तुरुन्त वितरण करे पर्ना माग करल बा ।

प्रदेश तथा संघीय सरकारमे मुक्त कमैयाहुकनके सामानुपातिक प्रतिनिधिके व्यवस्था कैनाके साथे बसोवास रहल गाउँपालिका, नगरपालिकामे गठन हुइना विविध समिति तथा आयोगमे प्रतिनिधित्वके व्यवस्था करे पर्ना, मुक्त कमैया वसोवास करटी रहल जमिनके कित्ताकाट करके लालपुर्जा उपलब्ध कराइल मुक्तकमैया वस्तीमे रुखुवा हुके जनधनके क्षति हुइटी रहल ओरसे उ रुखुवाहे तत्काल हटैना निर्देशन करे पर्ना माग करल बा ।

मुक्तकमैया बसोवास करल प्रत्येक स्थानीय सरकारमे मुक्त कमैयाहुकनके लाग शिक्षा, स्वस्थ्य, स्वच्छ खानेपानी, रोजगार तथा वस्ती विकासके लाग अनिर्वाय बजेट विनियोजन कैना व्यवस्था करे पर्ना माग करल बा ।

नेपाल सरकारसे मुक्त कमैयाके वालबालिका तथा छुट कमलहरीके लाग परिचयपत्रके व्यवस्था करकेृ उच्च तह तथा प्राविधिक शिक्षामे पहँुचके लाग निशुल्क तथा आरक्षणके व्यवस्था करे पर्ना, छुट मुक्त कमलहरीहुकनके पहिचान कैनाके साथे परिचयपत्रके व्यवस्था करके स्वास्थ्य, शिक्षा ओ रोजगारके प्रबन्ध करे पर्ना माग मञ्चके अध्यक्ष बटैली ।

मुक्तकमैयाहुकनहे पुनःस्थापना करल वस्तीमे लडिया कटान हुके मुक्त कमैयावस्ती विस्थापित हुइटी रहल ओरसे उ वस्तीहे सट्टा भर्ना करेपर्ना, प्रत्येक मुक्तकमैया परिवारहे गरिवी परिचयपत्र उपलब्ध करके निशुल्क स्वास्थ्य बिमाके व्यवस्था करे पर्ना, मुक्तकमैयाहुकनके दिगो जिविको पार्जनके लाग मुक्त कमैयासे संचालित सहकारीमे मुलधनके व्यवस्था करे पर्ना माग करल बा ।

ओस्टेक करके कैलाली जिल्लाके गोदावरी नगरपालिका वडा नं ५ मे २०५८ सालसे ३६ घरपरिवार मुक्त कमैया वसोवास करके भोगचलन करटी आइल ओरसे उ जमिनमे १० वर्ष पाछे आके नेपाल सरकारसे ५०.५ हेक्टर भोगमे अधिकार गेटा मेडिकल कलेजहे डेलेसेफे उहीहे ढेर जमिन गेटा मेडिकल कलेजसे कब्जा करल ओरसे उ जमिन मुक्त कमैयाहुकनहे उपलब्ध कराईबेर मेडिकल कलेजहे कौनो असर नइपर्ना हुइल ओरसे उ जमिनमे मुक्त कमैयाहुकनके लाग किट्टाकात करके लालपुर्जा उपलब्ध करैना राष्ट्रिय भुमि आयोग कैलालीहे यथासिघ्र निर्देशन डेहे पर्ना माग करल बा ।

टिकापुर नगरपालिका वडा नं १ स्थित शिवनगर मुक्त कमैया वस्तीमे २०६३ सालसे ३५० घरधुरी मुक्त कमैया वसोवास करके भोगचलन करटी रहल ओरसे उ जमिन टिकापुर बहुमुखी क्याम्पसके अवरोधके कारणसे उ जग्गा टिकापुर बहुमुखी क्याम्पसके हो नइहो छनविन करके उहे बैठल ठाउँमे मुक्त कमैयाके लाग किट्टाकात करके लालपुर्जा उपलब्ध करैना राष्ट्रिय भुमि आयोग कैलालीहेफे निर्देशन डेहे पर्ना ज्ञापनपत्र मार्फत माग करल बा ।

कमैया बाहुल्य रहल पाँच जिल्लामे अस्टे मेरिक समस्या विद्यमान रहल ओरसे समस्या पहिचान करके तत्काल समाधान कैना माग करल बा ।

मानव सभ्यताके कलंकके प्रथाके रुपमे रहल कमैया प्रथाके मुक्ति २०५७ साल सावन २ गते, कमलहरी प्रथाके मुक्ति २०७० साल सावन ३ गते ओ हलिया प्रथा मुक्तिके घोषण २०६५ साल भदौ २१ गते, हरुवाचरुवाके मुक्ति २०७९ साल सावन २ गते करके कमैया पुनःस्थापनाके लाग कमैया श्रम निषेध ऐन नानके स्वतन्त्रता ओ बसोबासके व्यवस्था नइहुइल कुछ मुक्त कमैयाहे बास, रोजगार, सिपमुलक तालिम, स्वस्थ्य, शिक्षाके व्यवस्था करलमे नेपाल सरकारहे धन्यवाद डेहल बा । मने सरकारी घोषणामे करल सम्बोधन अनुरुप मुक्त कमैया, कमलहरी, हलियाहुकनके व्यवस्थित पुनःस्थापना हुई नइसेक्के अस्थाई शिविरमे जीवन विटैना वाध्य बटै ।

सरकारसे मुक्त कमैयाहुकनहे पहिचान करके परिचयपत्र समेत उपलव्ध कराइल कुल मुक्त कमैया ३२५०९ परिवार रहलमे सरकारसे २७ हजार ५७० परिवारहे केल पुनस्र्थापना कैना नीति लेहल बा । ४ हजार ९३९ घरपरिवारहे सेतो, पहेंलो परिचयपत्रके वाहनामे विस्थापित करलमे कैलालीमे ९५३ घरधुरी, कन्चनपुर जिल्लामे १२९ घरधुरी, बर्दियामे १२८४ ओ दाङमे सट्टा भर्ना ६७ घरधुरी करके जम्मा ७३३३ परिचय पत्र प्राप्त मुक्त कमैयाहुकनके पुनस्र्थापना कार्यहे व्यवस्थित कैना ज्ञापन पत्र मार्फत माग करल बा ।

मुक्त कमैया, कमलहरी, हलियाहुकनके क्षेत्रमे कार्यरत संस्था मुक्त कमैया महिला बिकास मञ्च कैलाली, मुक्त कमैया बडघर सञ्जाल कैलाली, मुक्त कमैया युवा संमाज कैलाली, मुक्त कमैया आन्दोलन परिचलन समिति कैलाली, मुक्त कमैया,कमलहरी अभियान्ता यज्ञराज चौधरी, मुक्त हलिया अभियन्ता हरि श्रीपाइली, कमैया आन्दोलन परिचालन समिति सदस्य सचिव वालाराम भट्टराई, कमासु दिगो विकास समाज कन्चनपुर, राष्ट्रिय मुक्त हलिया समाज नेपालसे ज्ञापनपत्र बुझाइल रहिट । ओस्टेक करके आज प्रधानमन्त्री शेरबहादुर देउवाहे ज्ञापनपत्र बुझैना कार्यक्रम रहल मुक्तकमैया महिला विकास मञ्चके कार्यक्रम निर्देशक ईन्द्र चौधरी बटैलै ।