कैैलारीमे अटवारी ओ तिज पर्वके शुभकामना अदानप्रदान कार्यक्रम
पहुरा समाचारदाता
हसुलिया, १० भदौ । कैलालीके कैलारी गाउँपालिका अटवारी ओ तिज पर्वके अवसरमे शुभकामना अदान प्रदान कार्यक्रम कैगिल बा । महिला तथा बालबालिका शाखाके आयोजनामे शुकके रोज अटवारी ओ तिजके शुभकामना अदानप्रदान कार्यक्रम हुइल हो ।
कैलारी गाउँपालिका महिला तथा बालबालिका शाखाके आयोजनामे शुकके रोज अटवारी ओ तिजके शुभकामना अदानप्रदान कार्यक्रमके वडका पहुना गाउँपालिका उपाध्यक्ष भगवतीकुमारी चौधरी रहल रहिट । कार्यक्रममे बोल्टी उहाँ अटवारी ओ तिज पर्वके शुभकामना डेटी यी टिहुवारसे कर्मचारी, जनप्रतिनिधि, सक्कु समुदायमे सम्बन्ध मजबुट हुइना बटैले रहिट ।
गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बमके अध्यक्षतामे हुइल कार्यक्रममे उहाँ कला संस्कृति जर्गेना कैना स्थानीयतहके दायित्य रहल बटैलै । कार्यक्रमे उहाँ अटवारी ओ तिज पर्वके अवसरमे सक्कुहुनहे शुभकामना डेटी कर्मचारी ओ जनप्रतिनिधिके सम्बन्ध मजा हुई पर्ना कहटी विकासके लाग समन्वय कैके जैना आवश्यक रहल बटैलै ।
कार्यक्रममे गाउँपालिकाके प्रमुख प्रशासकीय अधिकृत विरबहादुर ऐर, वडा नम्बर ५ के अध्यक्ष विष्णुप्रसाद चौधरी, गाउँपालिकाके निवर्तमान उपाध्यक्ष लक्ष्मी सत्गौवा लगायतसे अटवारी ओ तिज पर्वके अवसरमे सक्कुहुनहे शुभकामना डेटी यैसिक कार्यक्रमसे कर्मचारी ओ जनप्रतिनिधिके सम्बन्ध प्रगढ हुइनामे विश्वास व्यक्त करलै ।
यिहे अवसरमे म्याजिकल चेयर्स प्रतियोगिता कार्यक्रमके आयोजना हुईबेर अनुशा चौधरी (कर्मचारी) पहिल, महेश्वरी चौधरी (सहकारी) दुसरा ओ लिलापति चौधरी (जनप्रतिनिधि) टिसरा हुइल रहिट ।
कार्यक्रमके संचालन सामाजिक विकास अधिकृत यगम कलेल करले रहिट । ओस्टेक वडा नम्बर ४ अध्यक्ष ठागुराम चौधरी, ओ वडा नम्बर ३ के महिला सदस्य शकुन्तला चौधरीफे अपन प्रस्तती प्रस्तुत करल रहिट । शुभकामना अदान प्रदान कार्यक्रमसंगे तिजके दर खैना ओ आ–अपन प्रतिभा डेखैना कार्यक्रम हुइल बा ।
ओस्टेक करके कैलारी गाउँपालिका वडा नम्बर ६ ओ वडा नम्बर ९ मे गाउँपालिका उपाध्यक्ष भगवतीकुमारी चौधरीके वडका पहुनामे अटवारी ओ तिजके दर खैना ओ शुभकामना अदानप्रदान कैगिल बा ।
