खेलाडीन खेलके विकाससंगे दुव्र्यसनी न्यूनिकरणमे लग्ना आग्रह
फुटवल प्रतियोगिताके उपाधि सागर यूवा क्लव सी गाउँहे
पहुरा समाचारदाता
हसुलिया, १५ भदौ । कैलालीके कैलारी गाउँपालिका–४ के गाउँमे थारु समुदायके विशेष पर्व अटवारी ओ महिलाहुकनके महान पर्व हरितालिका तिजके उपलक्ष्यमे हुइल पुरुष फुटवल प्रतियोगिताके उपाधि सागर यूवा क्लव सी गाउँहे मिलल बा ।
न्यू यूवा सुन्दर क्लव के गाउँके आयोजनामे भदौ ६ से १५गतेसम हुइल पुरुष फुटवल प्रतियोगिताके समापनमे सागर यूवा क्लव सी गाउँ उपाधी चुम्टी पहिल हुइल हो । अपन प्रतिस्पर्धी अस्मिी म.म. सेन्टरहे शुन्यके विरुद्ध पाँच गोल मरटी सागर यूवा क्लव पहिल रहे । उ संग्गे विजेता क्लव एक लाख एक सय पाँच रुप्या हात परले बा । कलेसे अस्मिी म.म. सेन्टर दुसर स्थानमे आइल बा । दुसर स्थानमे आइल अस्मिी म.म. सेन्टर उपविजेता पचास हजार एक सय पाँच रुप्या नगद पुरस्कार पैले बा ।
फुटवल समापन कार्यक्रमके वडका पहुना कैलारी गाउँपालिका अध्यक्ष राजसमझ चौधरी रहल रहिट । कार्यक्रममे सम्बोधन करटी उहाँ खेलाडीहुकनहे खेलके विकास संगे लागु औषध दुव्र्यसनी न्यूनिकारणमे लग्ना यूवाहुकनहे आग्रह करलै । उहाँ कहलै, ‘यूवा देशके कर्णाधर हुइट । मने ढेर यूवा लागु औषध दुव्र्यसनीमे फँस्टी ओरसे सुधारके लाग कार्यक्रम आघे बह्रैना जरुरी बा ।’ कैलारी गाउँपालिका वडा नम्बर ४ के यी खेल मैदानहे मिनि रंगशालाके लाग डिपिआर तयार हुइलफे उहाँ जानकारी करैलै । ओस्टेक न्यू यूवा सुन्दर क्लवहे फुटवलसंगे भलिवल लगायत और प्रतियोगिताके आयोजना कैना गाउँपालिका अध्यक्ष आग्रह करलै ।
विशिष्ट पहुना नेपाली काँग्रेस कैलारी गाउँपालिकाके सभापति कृष्णप्रसाद चौधरी खेलाडीहुकनमे अनुशासन, गतिशिलता ओ विकासके लक्ष्य अनिवार्य रहल बटैलै । ओस्टेक उहाँ, गाउँपालिकाहे भौतिक विकाससंगे खेलकुद, शिक्षा ओ स्वास्थ्यमे ध्यान डेना आग्रह करलै ।
कैलारी गाउँपालिका वडा नम्बर ४ के वडा अध्यक्ष ठागुराम चौधरी अपन वडामे संचालन हुइल प्रतियोगितामे सभ्यताके साथ खेलाडीहुकन खेलमे सहभागी हुडेलकमे धन्यवाद ज्ञापन करल रहिट । कैलारीमे खेलकुदके नाउँसे यी वडा चर्चित हुइल ओरसे अइना दिनमे प्रतियोगिताहे निरन्तरता डेना उहाँ आग्रह करलै ।
वडा नम्बर ४ के वडा सदस्य मोहनलाल चौधरी यी ठाँउमे २३ बरससे खेलकुद प्रतियोगिता हुइल ओरसे यहाँसे खेलल खेलाडीहुकनके विकास हुइटी राष्ट्रिय खेलमे सहभागि हुइना मौका पाइल बटैलै ।
न्यू यूवा सुन्दर क्लवके सल्लाहकार समिति संयोजक टेकबहादुर नेपाली यी ठाउँमे नम्मा समयसे खेलकुद प्रतियोगिता हुइटी आइल ओरसे खेलमैदानके विकास कैना आग्रह करलै । पालिकासे खेलमैदान संरक्षणके लाग तारजालीके व्यवस्था कैनाफे उहाँ आग्रह करलै ।
समापन कार्यक्रममे कैलारी गाउँपालिका प्रवक्ता तथा वडा–७ के वडा अध्यक्ष दिपेन्द्र बहादुर बम, वडा–४ वडा सदस्य लालबहादुर विका, वडा–९ के वडा सदस्य धनबहादुर राना, इप्रका हसुलियाके प्रमुख रामसिंह बोहरा, भल्मन्सा, बुद्धिजिवी लगायतहुकनके सहभागिता रहल रहे । कार्यक्रममे खेलाडी ओ प्रतियोगिताहे सहयोग करुइयाहुकनके सम्मानफे कैगिल रहे ।
समापन कार्यक्रम न्यू यूवा सुन्दर क्लवके अध्यक्ष बृक्षलाल चौधरीके अध्यक्षतामे हुइल रहे । कलेसे संचालन टेकेन्द्र परियार करले रहिट ।
