बाढ पीडितहुकन ओर ध्यान डेउ सरकार

सुदूरपश्चिम प्रदेशमे गैल कुवाँर १ गते ओर आइल बाढके कारण ढेर धनजनके क्षति हुई पुगल रहे । प्रदेशके पहाडी भु–भागमे पहिरो गिरके बहुट जानेक अकालमे ज्यान गुमैना बाध्य हुइलै । टमान परिवार घरवारविहिन हुइलै । ओस्टेक प्रदेशके तराई जिल्ला कैलाली, कञ्चनपुरमे बाढ आके फे धनजनके क्षति हुइल बटै । दुई जिल्लामे कैयौ जाने ज्यान गुमैलै । हजारौ परिवार विस्थापित हुइलै । पहिरो, बाढके कारण सुदूरपश्चिमबासी मजासे डसियाफे मनाइ नइपैलै । बाढ प्रभावितहुकनके घर भत्कल कारण करिब एक महिनासम विस्थापित हुइल अवस्था रहे । फेरसे गैल विफेक रोजसे निरन्तर भिषण पानी बरसना सुरु करले बा । डसिया टिकाके रोजसे अभिनसम पानी बरसटी बा । भजनी नगरपालिका, जानकी गाउँपालिका ओ टीकापुर नगरपालिकाके टमान वडामे बाढसे विस्थापितहुक्रे अपन घर लौटे नइपैटी ओइनके घर फेर पानीसे डुबैले बा । बाढसे प्रभावित/विस्थापित फेरसे सडक, सार्वजानिक विद्यालयमे बास बैठना बाध्य बटै । कैलालीके टीकापुर नगरपालिका ओ जानकी गाउँपालिकाके २ सय ५० घरधुरी विस्थापित हुइल बटै ।

जिल्ला प्रशासन कार्यालय कैलालीसे डेहल जानकारी अनुसार टीकापुर नगरपालिकाके टमान वडाके २ सय २५ परिवारके ८ सय १६ जाने ओ जानकी गाउँपालिकाके २ वडाके २५ परिवारके १०४ जाने विस्थापित हुइल बटै । किसानके पिडाफे ओस्टेक बा । पोहोर साल बेमौसमी बाढसे सुदूरपश्चिचमके लाखौ किसानके धानवाली नष्ट हुइल । यी सालफे पाकल धान किसानसे काटे नइपैटी वालीमे अखुवा लागे लागल बा ।

यिहे अइना अगहन ४ गते प्रतिनिधि सभा सदस्य ओ प्रदेश सभा सदस्य निर्वाचन बहुट लग्गे आसेकल बा । एक ओर निर्वाचन चहलपहल जोरसे बह्रल बा । दुसर ओर मनसुन सक्रिय हुके करिब एक हप्तासे निरन्तर पानी बरसटी बा । अब्बे कैलालीमे केल हजारौ परिवार विस्थापित हुइल अवस्था बा । निर्वाचन तालिका अनुसार सक्कु जानेक ध्यान निर्वाचन ओर बह्रल ओरसे बाढ पीडितहुकनके ओेरफे नजर लगैना जरुरी बा ।