जयरानीके जादु, जिटली पाँचौं स्वर्ण

पोखरा, ३ कार्तिक । नेपाल आर्मीके जयरानी थारु नवौं राष्ट्रिय खेलकुद प्रतियोगितामे पाँचौं स्वर्ण जिटले बटी ।

उहाँ सम्मिलित आर्मीके टिमसे महिला ४ गुणा ४०० रिलेमे स्वर्ण जिटलसंगे उहाँक पदक संख्या ५ पुगल बा । ५ स्पर्धामे भाग लेहल जयरानी सक्कु ५ स्पर्धामे स्वर्ण जिटली । उ मन्से उहाँ ३ ठो स्पर्धामे राष्ट्रिय कीर्तिमानसमेत बनैली ।
जयरानीसहित सरस्वती भट्टराई, निर्मला थापा ओ कसेली चौधरी सम्मिलित आर्मी ४ मिनेट ०२.७८ सेकेन्डमे पूरा करटी स्वर्ण जिटल हो ।

पाँचौं स्वर्ण जित्न क्रममे जयरानीसहितके आर्मी टिम भाग्यमानी सावित हुइली । कारण यी स्पर्धामे एपीएफ पहिल हुइलेसे लेन परिवर्तन करल कारण अयोग्य घोषित हुके आर्मीसे स्वर्ण जिटल हो । निशा थारु, सम्झना थारु, अरुणा रिजाल ओ रामकुमारी थारु सम्मिलित लुम्बिनीसे ४ मिनेट १४.८० सेकेन्डके समय निकरटी रजत पदक जिटल बा ।
सन्तोषी श्रेष्ठ, अञ्जु खड्का, रजिना दुलाल ओ स्वागत खाइजु, सम्मिलित बागमती प्रदेशसे ४ मिनेट २२.७९ सेकेन्डके समय निकरटी कांस्य जिटल बा ।