धडपकडसेफे पीडितहे न्यायके डगर खोजी

कैलालके धनगढी उपमहानगरपालिका–५ पञ्चोदय माध्यमिक विद्यालय कक्षा ८ मे अध्ययनरत बालिका चेतना साउँदके यिहे १५ गते विफेक रोज धनगढी उपमहानगरपालिका–५ हसनपुर पिपल चौतारा नजिक ग्रेडरसे डबके मृत्यु हुइल रहे । विद्यालय आवागमनके समयमे सडक निर्माणके क्रममे अनियन्त्रित ढंगसे ग्रेडर चलैना चालकके गम्भीर लापरवाहीसे घटना घटल हो । यी घटना सक्कु जनहनहे दुखी बनैले बा । ग्रेडरके ठक्करसे घाहिल हुके सडक किनारमे गिरल बालिकाहे चालकसे सुनियोजित रुपमे ग्रेडर ब्याक करके डबाके मुवाइल बाट अइटी बा । यैसिन हर्कट कैना बहुट गलत हो । यी घटनापाछे पीडित बालिका ओ उहाँक परिवारहे न्याय तथा क्षतिपूर्ति ओ दोषी उपर कडा कानूनी कारवाही लगायत माग करके विद्यार्थीनसे आन्दोलनरत सुरु करले बटै ।

जिल्ला प्रशासन कार्यालय कैलाली ओ जिल्ला प्रहरी कार्यालय कैलाली यी घटनाके विषयमे गम्भीर ओ सम्बेदनशील बन्ना जरुरी बा । आन्दोलनरत विद्यार्थीहुकनके मागप्रति संम्वेदनशील हुइना छोरके विद्यार्थी उप्पर अनावश्यक धरपकड कैलेसे समस्या आउर बह्रटी जाई । घटनापाछे धनगढी बजार दुई दिनसे तनावग्रस्त अवस्थामे रहल बा । विफेक रोज विद्यार्थीनके आन्दोलन उग्र रुप लेहल जेकर कारण प्रशासन कुछ ठाउँमे निषेधाज्ञ जारी करे परल, शुकके रोजफे विद्यार्थीनहे आन्दोलन जारी रहल, प्रहरी ओ विद्यार्थी विच धडकपड हुइल, प्रहरीसे आश्रुग्याँसफे प्रहार करल । टबमारे अब्बे बह्रटी गैल परिस्थितीहे असहज ओ थप दुर्घटना हुई नइडेना संबेदनशिल हुके सहजीकरण करेडेना नागरिक समाज, मानवअधिकारकर्मी एवं बौद्धिक जगत आघे बह्रना जरुरी बा ।