वडा स्तरीय टिम छनौट सुरु

पहुरा समाचारदाता
हसुलिया, २० अगहन । कैलालीके कैलारी गाउँपालिकामे अइना पुस महिनामे हुइना अध्यक्ष कपके लाग वडा स्तरीय टिम छनौट सुरु हुइल बा । गाउँपालिकाके नौ वडा मन्से अब्बेसम अधिकाँस वडा नम्बरमे वडा स्तरीय प्रतियोगिता करटी टिम छनौट हुसेकल बा ।

कैलारी गाउँपालिका वडा नम्बर ७ मे मंगरसे टिम छनौटके लाग प्रतियोगिताके उदघाटन हुइल बा । वडा अध्यक्ष दिपेन्द्र बहादुर बमके वडका पहुनामे हुइल कार्यक्रममे उहाँ वडा नम्बर ७ खेलकुदके क्षेत्रमे आघे रहल बटैलै ।
उहाँ कहलै, कृषि, शिक्षा ओ स्वास्थ्य संगे खेलकुद क्षेत्रहेफे महत्वपूर्ण रुपमे लेहल बा । कृषकके माग सम्बोधन कैना गाउँपालिका अग्रसर बह्रल बा । पाँच बरसमे जनताके इच्छा ओ आकांक्षा अनुसार काम करटी आघे बह्रबी ।’
गाउँपालिकाके प्रवक्त समेट रहल उहाँ मालपोतमे आधा छुट, किसानहे सम्बोधन करटी कृषि मिटर, बोरिङके व्यवस्था हुइना बटैलै ।

उदघाटन कार्यक्रममे वडा नम्बर ७ के महिला वडा सदस्य सुन्दरी चौधरी, राष्ट्रिय खेलाडी तथा वडा स्तरीय प्रतियोगिताके संयोजक विष्णु प्रसाद चौधरी, राष्ट्रिय खेलाडी तथा जनता नमुना आधारभुत विद्यालयके खेलकुद शिक्षक ठगराज डगौरा, रतनपुरके भल्मन्सा दिपक चौधरी, छटकपुरके भल्मन्सा जियाराम चौधरी, संरक्षण यूवा क्लवके अध्यक्ष सुन्दर चौधरी लगायत मन्तव्य व्यक्त करल रहिट । शंकर यूवा क्लव छटकपुर बसन्ताके अध्यक्ष हरि चौधरीके अध्यक्षतामे हुइल उदघाटन कार्यक्रमके संचालन मञ्जु चौधरी करले रहिट ।

वडा स्तरीय खेलकुद समितिके आयोजना, वडा नम्बर ७ के आर्थिक ओ शंकर यूवा क्लव छटकपुर बसन्ताके विशेष सहयोगमे वडा स्तरीय छनौट फुटवल, भलिवल प्रतियोगिता हुइटी बा । मंगरके रोज उदघाटन खेल भुइयाँफाटा ओ छटकपुरविच हुइल बा । व्याडमिन्टन प्रतियोगिताके लाग भर छनौट हुसेकल बा । पहिलमे तिर्थ चौधरी, सजिव चौधरी हुइल बटै । दुसरमे दयाशंरक चौधरी ओ आर्यन चौधरी हुइल बटै ।

ओस्टेक करके अध्यक्ष कपके लाग वडा नम्बर १, २, ६ नम्बरमेफे वडा स्तरसे टिम छनौट हुइटी रहल गाउँपालिका अध्यक्षके स्वकीय सचिव जितेन्द्र चौधरी बटैलै । उहाँ कहलै, वडा स्तरमे यी महिनामे टिम छनौट हुसेकी, अध्यक्ष कप पुस महिनाके पहिल सातासे सुरु हुई ।

कैलारी गाउँपालिकाके अध्यक्ष राजसमझ चौधरी आघे सालसम खेलकुद ३२ लाख खर्च हुइल मने टमान क्लव नेट वलफे नइपाइल ओरसे सक्कु क्लवहे समान दुष्टिसे हेरक लाग अध्यक्षके आयोजना करे लागल बटैलै ।
उहाँ कहलै, ‘खेलाडीहुकनहे खेलके विकास संगे लागु औषध दुव्र्यसनी न्यूनिकारणमे लग्ना यूवाहुकनहे आग्रह करलै । उहाँ कहलै, ‘यूवा देशके कर्णाधर हुइट । मने ढेर यूवा लागु औषध दुव्र्यसनीमे फँस्टी ओरसे सुधारके लाग कार्यक्रम आघे बह्रैना जरुरी बा ।’ कैलारी गाउँपालिका खेलकुद क्षेत्र आघे बह्रल कहटी अप्खीबार अध्यक्ष कपके गाउँपालिकासे १५ लाख बजेट छुटयाइल बा ।