विश्वकपके उपाधि अर्जेन्टिनाहे
काठमाडौं, ४ पुस । अर्जेन्टिनासे ३६ वर्षपाछे विश्वकप फुटवलके उपाधि जिटले बा । । कतारके लुसेल स्टेडियममे हुइल रोमाञ्चक नाटकीय खेलमे फ्रान्सहे टाइब्रेकरमे ४–२ से हरैटी अर्जेन्टिनासे विश्वकप उपाधि जिटल हो ।
यी आघे सन् १९७८ ओ १९८६ के विश्वकप जिटल अर्जेन्टिनाके यी टिसरा उपाधि हो ओ उ ३६ वर्षपाछे विश्वकप उपाधि उचालल हो । खेलमे अर्जेन्टिनासे २ चो लेहल अग्रता जोगाइए नइसेक्के खेल टाइब्रेकरमे पुगल रहे ।
८० मिनेटसम अर्जेन्टिनासे २–० के अग्रता बनाइल रहे । लियोनेल मेस्सीसे २३ औं मिनेटमे पेनाल्टीमार्फत गोल करटी टिमहे अग्रता डेहुवाइल रहिट । ३६ औं मिनेटमे डिमारियासे अर्जेन्टिनाके अग्रता दोब्बर परलै ।
पहिल हाफमे निरस खेल प्रदर्शन करल फ्रान्स दुसरा हाफमे खेलमे लौटल । मने फ्रान्ससे गोल कैना ८० औं मिनेटसम अस्रा लागे परठ । ८० औं मिनेटमे पेनाल्टीमे गोल करल केलियन एम्बाप्पेसे ओकर ९० सेकेन्डभिटर दुसर गोल करके खेल बराबरी करलै ।
निर्धारित ९० मिनेटमे दुनु टिमसे २–२ गोल हुइलेसेफे खेल अतिरिक्त समयमे धकेलल । १०८ औं मिनेटमे मेसीसे दुसरा गोल करके टिमहे फेर अग्रता डेहुवइलै । मने फ्रान्ससे ११८ औं मिनेटमे दुसरा पेनाल्टी पाइल । जिहीहे युवा स्टार एम्बाप्पेसे खेर जाई नइडेलै ।
